«Նոյեմբերի 22-ին ԵՊՀ-ի Պատմության ֆակուլտետի մասնաշենքում «Հակահարված» art խմբի անդամների նկատմամբ ֆակուլտետի դեկանի և մի խումբ երիտասարդների կողմից գործադրված բռնության վերաբերյալ ոստիկանության Կենտրոնի բաժինը, երեկվա դրությամբ, գործ չէր հարուցել»,- գրում է «Հայկական ժամանակ» թերթը։
«Ոստիկանության հասարակայնության հետ կապի և լրատվության վարչության փոխանցմամբ, շարունակվում է նյութերի նախապատրաստման գործընթացը:
Նշենք, որ ոստիկանությունն արդեն ունի միջադեպի հետ կապված բոլոր տեսագրությունները, և քրեական գործ հարուցելու համար անհրաժեշտ է սպասել միայն դատաբժշկական փորձաքննության արդյունքներին:
Մեր ունեցած տեղեկություններով, միջադեպի ակտիվ մասնակից, Պատմության ֆակուլտետի դեկան Էդիկ Մինասյանն այս գործով արդեն երկու անգամ հարցաքննվել է: Մեր թղթակցի հետ զրույցում ինքը` Մինասյանը, հերքել է այս տեղեկությունը` պնդելով, որ ինքը մի անգամ է բացատրություն տվել՝ դեպքի օրը»,- եզրափակում է թերթը
