Պաշտպանության նախարար Սեյրան Օհանյանը երեկ լրագրողներին ասել է, որ Մոսկվայում մահացած զինծառայող Արթուր Քոչարյանի կյանքը փրկելու համար հիվանդության հայտնաբերման առաջին իսկ օրվանից ՊՆ-ի կողմից արվել է հնարավոր ամեն բան: Քոչարյանների ընտանիքը այս հայտարարությունից հետո հերթական հաղորդագրությունն է տարածել, որտեղ ներկայացրել է զինվորի հիվանդությանը և դրան հաջորդած դեպքերի մասին նոր մանրամասներ:
«Արթուրի հիվանդության հայտնաբերումից հետո պաշտպանության նախարարությունից նախ խոստացան, որ կհոգան բուժման բոլոր ծախսերը: Մենք պարզեցինք, որ Երևանում նման կարգի վիրահատություն չեն կատարում: Նման հիվանդությունը բուժվում է կամ Ռուսաստանում, կամ Գերմանիայում: Մենք ընտրում ենք առավել մատչելի տարբերակը՝ Մոսկվան, սակայն միանգամից կանգնում ենք խնդրի առաջ. նախարարությունից հայտարարում են, որ իրենք չեն կարող անհրաժեշտ դրամական օգնությունը տրամադրել և կարող են միայն 3 միլիոն դրամ տալ, մինչդեռ Մոսկվայում վիրահատությունն արժեր 67.000 ԱՄՆ դոլար: Եվ այսպես շարունակվեց գրեթե մեկ ամիս. ՊՆ-ի կողմից մենք որևէ ադեկվատ պատասխան չէինք ստանում: Սա հենց այն ընթացքն է, որ կանխորոշեց Արթուրի ճակատագիրը: Ռուս բժիշկների խոսքերով, եթե Արթուրը տեղափոխվեր Մոսկվա գոնե 2 շաբաթ շուտ, նրան հնարավոր կլիներ փրկել: Հենց այս ընթացքում էր, որ մենք ՊՆ-ին պարբերաբար հիշեցնում էինք խոստման մասին, սակայն լսում չոր պատասխան. «Մեզ վրա հույս չդնեք, ճարեք հովանավորներ»: Հենց այս ընթացքում էր, որ մենք ստիպված եղանք դիմել «Չենք լռելու» կազմակերպությանը, որը ևս 2 օրով ուշացրեց տեսանյութի հրապարակումը՝ օրական մի քանի անգամ հորդորելով մեզ սպառել հարցի անաղմուկ լուծման բոլոր միջոցները, պատճառաբանելով աշնանային զորակոչի մթնոլորտի վրա չազդելու պատճառաբանությամբ: Եվ այսքանից հետո առաջին հայացքից ազնիվ մարդ թվացող Սեյրան Օհանյանը հայտարարում է, թե իրենք «առաջին օրվանից արել են, ինչ կարողացել են»:
Երբ Արթուրի մասին «Չենք լռելու»-ի տեսանյութը տարածվեց համացանցում և լրատվամիջոցներում աղմուկ բարձրացրեց, նախարարությունից պատասխանեցին, որ իրենք օգնել են այնքան, որքան հնարավորությունները ներել են և Մոսկվայում բուժելու հարցում իրենց վրա հույս դնել պետք չէ: Սակայն ավելի ուշ, քննադատությունների տարափի տակ, ՊՆ-ն հայտարարեց, որ կհոգա Արթուրի բուժման ծախսերը: Սակայն, ինչպես հետո պարզվեց, այդ ժամանակ արդեն ուշ էր:
Կոչ ենք անում հանրապետության նախագահ Սերժ Սարգսյանին ևս անհրաժեշտ եզրահանգումներ անել մեր որդու հետ տեղի ունեցած պատմությունից:Հաջորդ շաբաթ մենք պլանավորում ենք Երևանում տալ մամուլի ասուլիս: Հանուն մեր որդու հիշատակի ենք մենք սկսում այս պայքարը: Հանուն նրա, որ Արթուրի ճակատագրին ոչ մի հայ զինվոր այլևս չարժանանա»,-ասված է հաղորդագրության մեջ:
