ԱՄՆ հյուպատոս Ջորջ Լինն այսօր ասուլիսի ժամանակ ԱՄՆ մուտքի արտոնագրերի դիմումի ներկայացման ու հարցազրույցների նշանակման փոփոխված ընթացակարգը ներկայացնելիս անդրադարձել է նաև Green Card-երի վիճակահանությանն ու այն արտագաղթին խթան դիտելու մեկնաբանություններին:
«Green Card-ի վճակահանության միջոցով Հայաստանից ԱՄՆ ներգաղթողների թիվը տարեկան 2000-ից պակաս է: Աշխարհից` ամեն տարի 1 մլն մարդ է օգտվում քարտից: Չեմ կարծում, որ մեծ թիվ է», – ասաց Ջորջ Լինը:
Հյուպատոսը վիճակագրական տվյալներ չներկայացրեց: Փոխարենը նշեց, որ անցած տարվա համեմատ ԱՄՆ ներգաղթող հայաստանցիների թիվն աճել է, բայց մեծ չէ: Նրա խոսքով տասը տարի առաջ ավելի շատ էին գնում, քան այսօր:
ԱՄՆ Սենատում Green Card-ի վիճակահանության վերացմանն ուղղված օրինագծի մասին Ջորջ Լինն ասաց, որ այն դեռ նախնական փուլում է և դեռ քննարկումներ են սպասվում, իսկ թե ինչ որոշում կընդունվի` ոչ ոք չի կարող ասել:
