Դեռևս 1988 թվականին մի շարք միջազգային կազմակերպություններ ահազանգել են, որ Ադրբեջանը բռնություններ է կիրառում ադրբեջանաբնակ հայերի նկատմամբ: Ինչպես նշեց միջազգային իրավունքի մասնագետ, իրավաբան Տարոն Սիմոնյանը, 1988 թվականի հուլիսի 7-ին Եվրոպական խորհրդարանն ընդունել է բանաձև, որտեղ նշվել է, որ Լեռնային Ղարաբաղը պատմականորեն պատկանում է Հայաստանին:
«Այդ փաստաթղթում մտահոգություն է նաև հայտնվում, որ Խորհրդային Ադրբեջանում տեղի են ունենում բռնություններ հայերի նկատմամբ»,- նշեց նա:
Ըստ պատմաբան Գևորգ Մելքոնյանի, Բաքվի հայերի ցեղասպանությունը սկսվել է դեռ 1988-ից և գագաթնակետին հասել 1990 թվականի հունվարի 13-19-ը: Այդ ընթացքում, զոհվել են ավելի քան 400 հայեր:
«Սա ադրբեջանական պետության կողմից կանխամտածված և կանխորոշված ցեղասպանություն է եղել: Այն ժամանակ Միխայիլ Գորբաչովը նույնիսկ հայտարարեց, որ եթե հայերը շարունակեն Լեռնային Ղարաբաղի անկախության համար պայքարել, ապա Բաքուն համապատասխան քայլեր կձեռնարկի: Արդյունքում, մի քանի օր հետո տեղի ունեցավ Բաքվի հայերի ցեղասպանությունը»,- ասաց պատմաբանը:
Ըստ Մելքոնյանի, Հայաստանը պետք է այս ամենը ներկայացնի միջազգային հանրությանը և հասնի նրան, որպեսզի միջազգային կառույցներն ընդունեն իրավական փաստաթղթեր, որտեղ կդատապարտվեն Ադրբեջանի գործողությունները:
