«Ժառանգություն» կուսակցության առաջնորդ Րաֆֆի Հովհաննիսյանի համար Ազատության հրապարակում վրան տեղադրելու համար կուսակցության ներկայացուցիչներ Հովսեփ Խուրշուդյանն ու Ռուբեն Հակոբյանը բանակցում են ոստիկանության ներկայացուցիչներ՝ գնդապետ Օսիպյանի և փոխգնդապետ Մովսիսյանի հետ:
Ռուբեն Հակոբյանը հայտարարեց, որ աղմուկ է, և խոսել չի լինում, առաջարկեց առանձնանալ ու քննարկել: Նա խնդրեց իրենց մենակ թողնել իրենց և խոստացավ ներկայացնել քննարկման արդյունքը:
Ինչպես հայտնել էինք, Ազատության հրապարակում Րաֆֆի Հովհաննիսյանի կողմնակիցները նրա համար վրան են փորձում տեղադրել, իսկ ոստիկանները թույլ չեն տալիս` պատճառաբանելով, որ թույլտվություն չկա: ՄԻՊ ներկայացուցիչը գրություն էր ներկայացրել և հայտարարել, որ ոստիկանության գործողությունները օրինաչափ չեն. հակասում են մարդու իրավունքների պաշտպանության սկզբունքներին: Ոստիկանության ներկայացուցիչներն էլ հայտարարեցին, որ այսպիսով խոչընդոտվում են այլոց իրավունքները:
