Հայաստանի եւ Սինգապուրի ԱԳՆ ղեկավարները քննարկել են երկկողմ հարաբերությունների զարգացման հեռանկարները

Պաշտոնական այցով խաղաղօվկիանոսյան երկրներում գտնվող Հայաստանի արտաքին գործերի նախարար Վարդան Օսկանյանը նախօրեին Սինգապուրում հանդիպեց իր պաշտոնակից Ջորջ Եոին, հայտնում է ՀՀ ԱԳՆ մամլո ծառայությունը: Հանդիպման ժամանակ Վ. Օսկանյանը ընդհանուր գծերով ներկայացրեց Հայաստանի վիճակը արդի աշխարհաքաղաքական միջավայրում, տարածաշրջանի հնարավորությունները եւ զարգացման միտումները: Այնուհետեւ ծավալվեց մտքերի փոխանակություն փոխադարձ հետաքրքրություն ներկայացնող մի շարք հարցերի շուրջ: Այդ առումով քննարկվեցին երկկողմ հարաբերությունները զարգացնելու հնարավորությունները` սկսելով ԱԳՆ-երի միջեւ խորհրդատվությունների անցկացումից եւ իրավապայմանագրային դաշտի ձեւավորումից: Քննարկվեց նաեւ սինգապուրյան զարգացման փորձի վերաբերյալ խորհրդատվություններ անցկացնելու հնարավորությունները: Դրական գնահատելով միջազգային կազմակերպություններում, հատկապես ՄԱԿ-ում համագործակցության փորձը` երկուստեք պատրաստակամություն հայտնվեց այսուհետ եւս խորացնել այդ համագործակցությունը: Հանդիպման ընթացքում խոսվեց նաեւ աշխարհի տարբեր մասերում առկա հակամարտությունների եւ դրանց կարգավորման ուղիների մասին: Այդ շրջանակներում նախարար Օսկանյանը ներկայացրեց Լեռնային Ղարաբաղի հարցի բանակցային ընթացքի ներկա վիճակը եւ հեռանկարները: Նույն օրը նախարար Օսկանյանն այցելեց Սինգապուրի հայկական եկեղեցի եւ հանդիպում ունեցավ տեղի հայ համայնքի ներկայացուցիչների հետ: Վ. Օսկանյանը աշխատանքային հանդիպում ունեցավ նաեւ Սինգապուրի պետական նախարար Զայնուլ Աբիդին Ռաշիդի հետ: Նույն օրը ուշ գիշերին ՀՀ ԱԳ նախարարը Սինգապուրից մեկնեց Երեւան: