«Ժառանգություն» խմբակցության ղեկավար Ռուբեն Հակոբյանը հնարավոր համարում է, որ ոչ իշխանական ուժերը Երևանի ավագանու ընտրություններից հետո համապատասխպան քվե ունենալու դեպքում կարող են կոալիցիա ձևավորել, բայց դրան պետք է նախորդի ազնիվ պայքարը նախընտրական փուլում: Այսօր ԱԺ ճեպազրույցների ժամին նա հայտարարեց, որ անհրաժեշտ է, որպեսզի այս ընտրություններին ոչ իշխանական ուժերը միասին հսկեն ընթացքը, քարոզչությունը տանեն օրենքի շրջանակներում:
Անդրադառնալով «Բարև Երևան» դաշինքի ցուցակին, նա նշեց, որ կատարյալ ցուցակ ենթադրելը ճիշտ չէ: «Մենք հարազատ ենք մնացել մեր սկզբունքներին. ունենալ ցուցակ, որտեղ պետք է արտացոլվեն նաև քաղաքացիական սպեկտորի ներկայացուցիչներ: Մենք ուշ ներկայացրեցինք, քանի որ մեր ցուցակում կան չորս կուսակցությունների ներկայացուցիչներ: 1/3-ում քաղաքացիական ակտիվիստներ են: Դժգոհություններն օրինաչափ և օբյեկտիվ են»,- ասաց Ռուբեն Հակոբյանը:
«Ժառանգություն» խմբակցության քարտուղար Զարուհի Փոստանջյանն իր հերթին ասաց, որ իրենք հաշվի են առել այն հանգամանքը, որ կան քաղաքացիներն, ովքեր ցանկանում են մասնակցել քաղաքի ղեկավարման գործընթացներին: «Մենք նրանց հնարավորություն ենք տվել: Մարդիկ կան, ովքեր կնեղանան, բայց մենք պետք է այս մշակույթի կրողը դառնանք»,- ասաց Զարուհի Փոստանջյանը:
Ռուբեն Հակոբյանն էլ նկատեց, որ եթե իրենք գնում են ընտրությունների, տարբեր շահեր կլինեն, որոնք բախվող են: «Եթե տարբեր շահեր կան, չի նշանակում, որ անազնիվ է լինելու պայքարը: Իշխանությունը կձգտի և կցանկանա, որ «Բարև Երևանը» քիչ ձայներ ստանա, որպեսզի նախագահի ընտրություններից հետո որոշ տեսակետներ հիմնավորեն, բայց ժողովուրդը հասկանում է, ինչ է կատարվում, իր քվեն կտա ում ցանկանում է»,- ասաց նա: Խմբակցության ղեկավարը նկատեց, որ նախագահական ընտրությունների ալիքը դեռ մնում է, այդ բարձրագույն ալիքի վրա է կայանալու Երևանի ավագանու ընտրությունը, և այն ավելին է, քան քաղաքապետական ընտրությունները: «Դրանք վեկտոր են դառնալու, որը նպաստելու քաղաքական պայքարին»,- ասաց նա:
