«Ոչ քիթ ջարդող մլիցուն», «Ոչ, արնախում ոստիկաններին», «Ոչ մլիցա, այո ոստիկան», «Ոչ Սերժի ախրաննիկ երազող ոստիկանին», «Վերջ ֆաշիստական ոստիկանությանը», «Չեբուռաշկան ոստիկան չէ». նման գրություններով պաստառներով Գլխավոր դատախազության շենքի դիմաց բողոքի ակցիա է` ի պաշտպանություն «Ժառանգություն» կուսակցության փոխնախագահ Արմեն Մարտիրոսյանի։ Ակցիան մասնակցում է նաև «Ժառանգության» առաջնորդ Րաֆֆի Հովհաննիսյանը, ով հայտարարեց. «Մեր պահանջն այն է, որ պատասխանատվության ենթարկեն բոլոր նրանք, ովքեր խախտել են ՀՀ Սահմանադրությունը և օրենքը՝ սկսած փետրվարի 18-ից մինչև ապրիլի 9-ը»:
Րաֆֆի Հովհաննիսյանն ասաց, որ պահանջում է պատասխանատվության ենթարկել ապօրինի հրահանգ տվողներին և այն ոստիկաններին, ովքեր բռնություն են կատարել համաքաղաքացիների և Արմեն Մարտիրոսյանի նկատմամբ: «Անվանական պատասխանատվություն ենք պահանջում»,- ասաց «Ժառանգություն» կուսակցության առաջնորդ ու ավելացրեց,- «Հրապարակում կար նաև մարդ, ով, ինձ թվում է, որ զինված էր, ձեռքին ինչ-որ մի բան կար, որ փորձեց վրաս հարձակում կատարել: Մինչև հիմա այդ հարցի պատասխանը չկա: Եթե ժամանակավոր և օրապահ իշխանությունը ցանկանում է մի քանի ամիս ևս իշխանավոր լինել, գոնե պետք է կարողանա պատասխան տալ այս հարցերին»:
Ավելացնենք, որ ակցիայի մասնակիցներն ու «Ժառանգության» անդամները մերժեցին գլխավոր դատախազի հետ հանդիպման հրավերը և ասացին, որ մինչև Արմեն Մարտիրոսյանը չիջնի ու չպարզեն հանդիպման մանրամասները, նրանք զրուցելու ոչինչ չունեն դատախազի հետ:
