Երևանի ավագանու ընտրություններին մասնակցող կուսակցությունները իրենց ծրագրերում անդրադարձել են հաշմանդամություն ունեցող անձանց խնդիրներին, բայց գրելը քիչ է, գործել է պետք: «Ունիսոն» ՀԿ գործադիր տնօրեն Արմեն Ալավերդյանն է այսօր ասուլիսի ժամանակ նկատել, իսկ նախկինում հաշմանդամություն ունեցող Հասմիկ Մուրադյանը քաղաքապետարանի աշխատակիցներին առաջարկել է գոնե մեկ օր սայլակով շրջել, որ հասկական` հաշմանդամություն ունեցողների համար ինչ խնդիրներ կան Երևանում:
«Ես ուզում ուշադրություն հրավիրել գետնանցումների վրա, որտեղ աստիճանների կողքին չկան բազրիքներ: Իսկ եթե օգնող չլինի չես կարողանա աստիճաններով իջնել»,- ասել է նա ու նշել նաև դեղատների մասին, որոնց աստիճանները փայլեցված գրանիտից են, իսկ դրանց վրա հաշմանդամություն ունեցողները սայթաքում են:
Արմեն Ալավերդյանն ավելացրել է, որ հասարակական նշանակություն ունեցող մշակութային օջախների մեծամասնությունը ևս հաշմանդամներին հարմարեցված չէ: Իսկ խնդիրների լուծելու համար պետք է պայքարի և պահանջատեր լինելու ուղին ընտրել. «Մենք չպետք է սպասենք, որ բարի քեռիները մի բան անեն մեր խնդիրների լուծման համար: Այսուհետ ավելի ակտիվ ենք պայքարելու մեր իրավունքների համար»:
Անդրադառնալով ընտրություններին և ընտրարշավին, Արմեն Ալավերդյանը նշել է, որ հերթական անգամ ոտնահարվում է լսողության խնդիր ունեցող մարդկանց իրազեկվելու իրավունքները:
«Խուլ մարդկանց համար վազող տողն անիմաստ է, հատկապես, որ չի էլ համապատասխանում էկրանին ընթացող պատկերին: Որևէ քարոզչական նյութ զուգորդված չէ սուրդո թարգմանությամբ, բացի «Կենտրոն» հեռուստատեսության լուրերից: Հորդորում եմ բոլորին, գոնե 1 հաղորդում զուգորդել նման թարգմանությամբ»,- ասել է Ա. Ալավերդյանը:
Արմեն Ալավերդյանը տեղեկացրել է նաև, որ «Ունիսոնը» նախագահական ընտրություններին մոնիթորինգ է անցկացրել Երևանում և պարզել, որ ընտրատեղամասերից միայն 31-ն են հարմարեցված տեղաշարժման խնդիրներ ունեցող մարդկանց, իսկ 44-ը գրեթե հարմարեցված են:
