Ազատամարտիկ, Հայաստանի Կասկադյորների ազգային ասոցիացիայի նախագահ Արմեն Պետրոսյանը հստակ տեղեկություն չունի Սյունիքի արոտավայրերը թրքախոս իրանցիներին վարձակալությամբ տալու պայմանավորվածության մասին, բայց նկատում է, որ «ծուխն առանց կրակի չի լինում»:
Այսօր ասուլիսի ժամանակ նա ասել է, որ մենք վերադառնում ենք անցյալ դարի սկիզբ, պատմությունը կրկնվում է: «Մենք կարողացանք արցախյան ազատամարտի ժամանակ ինչ-որ բան անել: Վստահ չեմ, որ մեր երեխաները վաղը, մյուս օրը ստիպված չեն լինի այդ հողերը նորից արյան գնով ազատագրել: Այդ սխալն այսօր չպետք է արվի: Ամեն ինչ չի կարելի վերածել բիզնեսի»,- ասել է ազատամարտիկն ու նշել, որ այդ հողերը կարող են օգտագործել մեր գյուղացիները:
Ազատամարտիկ, բնապահպան Ապրես Զոհրաբյանն ուշադրություն դարձրեց այն հանգամանքին, որ հայկական կողմից հաճախ հնչող կարծիքները, թե այդտեղ գալու են ադրբեջանցիներ բնակվեն՝ «ջուր են լցնում Բաքվի ռեժիմի քարոզչական ջրաղացին»: «Բաքվի ռեժիմն ամեն ինչ անում է, որ նրանց ներկայացնի որպես ադրբեջանցիներ, բայց այդ թրքախոս իրանցիները լավ ինտեգրված են Իրանի սոցիալական, տնտեսական, կրոնական համակարգին և իրենց այդ երկրի մասն են զգում», – ասել է նա:
