«Երեւանի եւ Ստեփանակերտի միջեւ բանակցային գործընթացում երբեմն առաջանում են տարաձայնություններ, սակայն դրանք լուծվում են աշխատանքային կարգով, եւ մենք կանգ ենք առնում առավել փաստարկված մոտեցման վրա»: Այդ մասին ԵԱՀԿ Մինսկի խմբի համանախագահների հետ Երեւանում կայացած հանդիպումից հետո լրագրողների հետ զրույցում հայտարարել է Լեռնային Ղարաբաղի նախագահ Արկադի Ղուկասյանը: Անդրադառնալով ազատագրված տարածքներին` Ա.Ղուկասյանը հայտարարել է. «Մեզ համար այդ տարածքները անվտանգության գոտի են, անվտանգության երաշխիք»: Նրա խոսքերով, անհնար է որեւէ հարց դիտարկել կարգավորման ընդհանուր համատեքստից դուրս: Պատասխանելով այն հարցին, թե ինչպիսին է նա տեսնում Լեռնային Ղարաբաղի կարգավիճակն առանց այդ տարածքների` ԼՂՀ նախագահը նշել է, որ «չէր ցանկանա ժամանակից շուտ բացել խաղաքարտերը»: «Խնդիրը հետեւյալն է` ցանկացած կարգավորում ենթադրում է փոխադարձ զիջումներ, իսկ թե կոնկրետ ինչպիսի, պետք է որոշվի բանակցությունների ընթացքում»,-ավելացրել է Ա.Ղուկասյանը` նշելով, որ հարցի չկարգավորված լինելը նույնպես լուծում է:
Պատասխանելով այն հարցին, թե ինչու է ԵԱՀԿ Մինսկի խմբի հետ հանդիպումը անցնում Երեւանում, այլ ոչ թե Ստեփանակերտում` Ա.Ղուկասյանը հաղորդել է, որ դա կապված է այն բանի հետ, որ միջնորդների տարածաշրջան այցելության ժամկետների մեջ ինչ-որ «խափանում» է եղել: «Դա չի նշանակում, որ հաջորդ հանդիպումը չի լինի Ղարաբաղում»,-նշել է Ա.Ղուկասյանը` ավելացնելով, որ այս հանդիպման շնորհիվ, ԵԱՀԿ ՄԽ համանախագահները կարողացան այցելել Երեւանում ԼՂՀ ներկայացուցչություն:
