Ոստիկանության Կենտրոնականի քննչական բաժնում հարուցվել է քրեական գործ թիվ 9/17 ընտրատեղամասում մեկից ավելի անգամ քվեարկելու փորձ կատարելու դեպքի առթիվ։
Ոստիկանությունում նախապատրաստված նյութերով պարզվել է, որ վարչական շրջանի բնակիչ Էդգար Եփրեմյանը 2013թ մայիսի 5-ին Երևանի ավագանու ընտրություններին մասնակցելու նպատակով գնացել է թիվ 9/17 ընտրատեղամաս, որտեղ փորձել է երկրորդ անգամ քվեարկել, ինչը կանխվել է հանձնաժողովի նախագահի կողմից։
Գլխավոր դատախազության մամուլի ծառայությունից հայտնում են, որ դեպքի առթիվ հարուցվել է քրեական գործ՝ ՀՀ քրեական օրենսգրքի 34-153-րդ հոդվածով, կատարվում է նախաքննություն։
Այսպիսով, մայիսի 5-ին տեղի ունեցած Երևանի ավագանու ընտրությունների օրն արձանագրված խախտումների կապակցությամբ հարուցվել է 6 քրեական գործ, որոնք բոլորն էլ վերաբերել են մեկից ավելի անգամ կամ այլ անձի փոխարեն քվեարկելու դեպքերին։
