Հայկական ոչ մի հեռուստաալիքով էրոտիկ ֆիլմ չի հեռարձակվում: Այս մասին այսօր խորհրդարանում 2012-ի պետբյուջեի կատարողականի քննարկման ժամանակ հայտարարեց Հեռուստատեսության և ռադիոյի ազգային հանձնաժողովի նախագահի տեղակալ Ժիրայր Դադասյանը: Նա նաև նկատեց, որ հեռարձակվող բաց տեսարանների ժամերը և չափորոշիչներն էլ օրենքով հստակեցված չեն:
ՀՌԱՀ փոխնախագահն անդրադարձավ նաև թաքնված գովազդի խնդրին. «Մենք շատ բծախնդիր ենք այդ հարցում, թաքնված գովազդի դեպքեր չեն հայտնաբերվել, բայց անբարեղխիղճ գովազդի դեպքեր կան»:
ԱԺ ՀՀԿ խմբակցության պատգամավոր Խոսրով Հարությունյանն էլ հարցրեց, թե ինչո՞ւ Հանրային հեռուստաընկերությամբ մուլտֆիլմ չի ցուցադրվում: Հանրային հեռուստառադիոընկերության խորհրդի նախագահի տեղակալ Ստեփան Զաքարյանը չպատասխանեց հարցին, ասաց որ անելիքները շատ են, և իրենք պետք է հասնեն իրենց ցանկությունների հեռուստատեսությանը 2015-ին:
