Ա.Սմբատյան. Ռուսական գազի սակագների հարցը կլուծվի երկու շաբաթվա ընթացքում

Հայկական եւ ռուսական կողմերը դրական են տրամադրված Հայաստան առաքվող ռուսական գազի սակագնի վերաբերյալ փոխզիջումային լուծում գտնելու հարցում, որը կբավարարեր ինչպես հայկական, այնպես էլ ռուսական կողմին: Այդ մասին PanARMENIAN.Net-ի թղթակցին տված հարցազրույցում հայտարարել է Ռուսաստանում ՀՀ դեսպան Արմեն Սմբատյանը` մեկնաբանելով գազի սակագնի շուրջ բանակցությունների ընթացքը: Ինչպես նշել է հայ դիվանագետը, ստեղծվել է մասնագետների խումբ, ովքեր ուսումնասիրում են հարցը եւ Հայաստանի ու Ռուսաստանի նախագահներին պետք է ներկայացնեն առաջարկություններ: Նրա խոսքերով, Ռուսաստանում այդ աշխատանքները ղեկավարում է էներգետիկայի նախարար Վիկտոր Խրիստենկոն, ով հանձնարարական է ստացել անմիջապես նախագահ Վլադիմիր Պուտինից: Ինչ վերաբերում է գազի սակագինը պահպանելու դիմաց հայկական կողմի որեւէ առաջրակի հնարավորությանը, ապա ըստ դեսպանի խոսքերի, նա տեղեկություններ չունի կոնկրետ առաջարկների վերաբերյալ: «Դա փակ ինֆորմացիա է: Երկու շաբաթից կամ գուցե ավելի շուտ ամեն ինչ պարզ կդառնա»,-ասել է Արմեն Սմբատյանը: