ՀՀ տարածքային կառավարման նախարարի առաջին տեղակալ Վաչե Տերտերյանն այսօր Սյունիքի մարզպետարանի աշխատակազմին, հանրապետական գործադիր մարմինների տարածքային ստորաբաժանումների, քաղաքային համայնքների ղեկավարներին ներկայացրեց նորանշանակ մարզպետ Վահե Հակոբյանին:
ՏԿ նախարարի առաջին տեղակալը շնորհավորեց Վ. Հակոբյանին` պաշտոնը ստանձնելու կապակցությամբ և հաջողություն մաղթեց հետագա աշխատանքներում: Նա նկատեց, որ Վ. Հակոբյանը նոր մարդ չէ մարզում, որպես այս ընտրատարածքից ընտրված պատգամավոր`քաջատեղյակ է մարզում առկա խնդիրներին և վստահություն հայտնեց, որ նա իր աշխատանքային փորձով ու գիտելիքներով կնպաստի մարզի սոցիալ-տնտեսական զարգացմանը և առկա խնդիրների լուծմանը:
Վ. Տերտերյանը շնորհակալություն հայտնեց նաև Սյունիքի նախկին մարզպետ Սուրեն Խաչատրյանին` համատեղ աշխատանքի և երկար տարիների համագործակցության համար, ինչպես նաև` մինչև նոր մարզպետի նշանակումը մարզպետի ժամանակավոր պաշտոնակատար,փոխմարզպետ Արա Դոլունցին` մարզպետարանի արդյունավետ աշխատանքներն ապահովելու համար, հայտնում է նախարարության Հասարակայնության հետ կապերի բաժինը:
