ՀՀ տարածքային կառավարման նախարարին կից կոլեգիայի այսօրվա նիստում քննարկվեց «Տեղական ինքնակառավարման մասին» ՀՀ օրենքում փոփոխություններ կատարելու մասին» օրենքի նախագիծը:
Փոփոխությունները հիմնականում վերաբերում են համայնքի զարգացման քառամյա ծրագրի կազմման ու հաստատման գործընթացին: Մասնավորապես, տրվում է քառամյա ծրագրի սահմանումը, հստակեցվում են ծրագրի հաստատման ընթացակարգերը, սահմանվում են ծրագրում պարտադիր կարգով ներառման ենթակա ուղղությունները, ինչպես նաև համայնքի ղեկավարի կողմից ամեն տարի ավագանուն ծրագրի իրականացման վերաբերյալ հաղորդում ներկայացնելու մեխանիզմ է ներդրվում:
ՏԿՆ աշխատակազմի տեղական ինքնակառավարման վարչության պետ Աշոտ Գիլոյանը տեղեկացրեց, որ մինչև նախագծի մշակումը ուսումնասիրվել է համայնքներում ծրագրերի կազմման և հաստատման հետ կապված ընթացիկ իրավիճակը, ինչպես նաև եվրոպական երկրների փորձը: Կմշակվի նաև քառամյա ծրագրերի կազմման մեթոդական ուղեցույց:
Նիստը վարող ՀՀ փոխվարչապետ, տարածքային կառավարման նախարար Արմեն Գևորգյանն առաջարկեց համայնքային ծառայողների վերապատրաստման դասընթացներում ներառել նաև քառամյա ծրագրի կազմման մեթոդաբանությանը, ինչպես նաև օրենսդրական վերջին փոփոխություններին վերաբերող թեմաներ: Նա հանձնարարեց փաստաթուղթը լրամշակելուց հետո ներկայացնել ՀՀ կառավարություն:
Կոլեգիայի քննարկմանը ներկայացվեց նաև «Տեղական ինքնակառավարման մարմիններում պետական մարմինների կողմից իրականացվող ստուգումների (հսկողական և վերահսկողական) և վարչական հսկողության գործընթացի կանոնակարգման մասին» վերլուծությունը:
Փաստաթուղթը լրամշակվելուց հետո մինչև տարեվերջ կներկայացվի ՀՀ կառավարություն:
