Վերջին տարիներին Հայաստանի հետ հարաբերությունները ձեռք են բերել ռազմավարական եւ դաշնակցային գործընկերության բնույթ, աչքի են ընկնում զարգացման դրական դինամիկայով: Այդ մասին հայտարարել է Ռուսաստանի ԱԳՆ պաշտոնական ներկայացուցիչ Միխաիլ Կամինինը ապրիլի 5-7 Հայաստանի արտգործնախարար Վարդան Օսկանյանի Մոսկվա կատարելիք այցի կապակցությամբ: Նրա խոսքերով, օրակարգում կլինեն Կովկասում իրավիճակի առողջացմանն ուղղված երկու երկրների ԱԳՆ-ի ջանքերի համակարգման, այստեղ առկա հակամարտությունների կարգավորման, համակովկասյան համագործակցության ծավալման համար վստահության մթնոլորտի ստեղծման հարցեր: «Օրակարգում կարեւորագույն տեղ կզբաղեցնի նաեւ ղարաբաղյան կարգավորումը»,-նշել է Կամինինը:
Ռուս դիվանագետը հիշեցրել է, որ Ռուսաստանը հանդես է գալիս հայ-ադրբեջանական երկխոսության շարունակման օգտին տարբեր մակարդակներում, առաջին հերթին երկու երկրների նախագահների միջեւ: «Մենք ելնում ենք նրանից, որ հակամարտության մասնակիցներն իրենք պետք է գտնեն փոխադարձաբար ընդունելի որոշում: Ռուսաստանը պատրաստ է ամենաակտիվ աջակցությունը ցուցաբերել ղարաբաղյան կարգավորման հարցում, ինչպես երկկողմ առումով, այնպես էլ որպես ԵԱՀԿ Մինսկի խմբի համանախագահ, եւ դառնալ ձեռք բերված պայմանավորվածությունների երաշխավորը»,-ասել է Կամինինը: Նա նաեւ նշել է, որ հաշվի առնելով Ռուսաստանի եւ Հայաստանի մոտեցումների նույնությունը միջազգային ահաբեկչության դեմ պայքարի հարցում, հատուկ ուշադրություն կդարձվի այդ հակաահաբեկչական ուղղությամբ քաղաքական համագործակցության ամրապնդմանն ուղղված ջանքերը համակարգելուն:
Նրա խոսքերով, կողմերը կարծիքներ կփոխանակեն միջազգային ասպարեզում երկկողմ փոխգործակցության հարցերի շուրջ, միջազգային կազմակերպություններում գործողությունների համակարգման, ինչպես նաեւ տարածաշրջանային խանդիրների շուրջ: «Կողմերը կքննարկեն նաեւ համագործակցության հարցեր ԱՊՀ շրջանակներում, այդ թվում նաեւ ՀԱԿՊ գծով»,-նշել է դիվանագետը:
Երկկողմ հարաբերությունների քննարկման ժամանակ նախարարները կքննարկեն համագործակցության ամրապնդման հարցեր, մասնավորապես, տրանսպորտային եւ վառելիքաէներգետիկ ոլորտներում, ինչպես նաեւ Ռուսաստանի եւ Հայաստանի սուբյեկտների միջեւ ուղղակի տնտեսական կապերի գծով: Բանակցությունների առաջնային թեմաներից մեկը կլինի Ռուսաստանում Հայաստանի տարվա անցկացումը, հաղորդում է ՌԻԱ «Նովոստին»:
