PAN-ը հակիրճ ներկայացնում է անցած հանգստյան օրերի կարևորագույն իրադարձությունները` նրանց համար, ովքեր չեն հետևել լրահոսին:
Եղանակային կտրուկ փոփոխության պատճառով հանրապետությունում տեղ-տեղ ցրտահարություն ու բերքի վնաս է գրանցվել: Ամենաշատը տուժածների թվում է Արմավիրի մարզի Էջմիածնի և Արմավիրի տարածաշրջանը:
Հայաստանի նոր ավիափոխադրող` «Արմենիա» ավիաընկերությունն օդային հաղորդակցությունների իրականացման հավաստագիր է ստացել։ Ավիաընկերությունը կսկսի կանոնավոր չվերթերի իրականացումը ապրիլի 21-ից դեպի Իսրայել և Մոսկվա։ Այնուհետև ընկերությունը կսկսի կանոնավոր չվերթեր իրականացնել դեպի Թեհրան, Դուբայ, Պրահա, Կիև, Մինսկ, Բարսելոնա, Լոնդոն և Լառնակա։
Ստամբուլում տեղի ունեցած ահաբեկչությունում զոհվել է հինգ մարդ, ևս 36-ը վիրավորվել է: Վիրավորվածներից մեկը հայ է՝ Օքսան Խաչանյանը:
Լևոն Արոնյանը ոչ ոքի խաղաց Սերգեյ Կարյակինի ու Անիշ Գիրիի հետ և Կարյակինի հետ կիսում է Հավակնորդների մրցաշարի առաջին հորիզոնականը:
Դեբրեցենում մեկնարկած գեղասահքի աշխարհի պատանեկան առաջնության աղջիկների մենասահքում Հայաստանի միակ ներկայացուցիչը՝ Անաստասիա Գալուստյանը, կարճ ծրագրից հետո դուրս է եկել եզրափակիչ:
Հանգստյան օրերը հաջող էին նաև հայ ծանրորդների համար. հավաքականի անդամներ Հռիփսիմե Խուրշուդյանը և Ռուբեն Ալեքսանյանը հաղթել են Ռուսաստանի նախագահի Գավաթի խաղարկությունում:
