Հայաստանի մարդու իրավունքների պաշտպանի գրասենյակը Թուրքիայի տարածքում գտնվող հայ քաղաքացիների հետ ծագած հնարավոր խնդիրների դեպքում անմիջական օգնություն ցուցաբերել չի կարող, որովհետև Հայաստանի ու Թուրքիայի միջև դիվանագիտական հարաբերություններ չկան: Այս մասին հայտնել է ՄԻՊ խոսնակ Զոհրապ Եգանյանը:
Միաժամանակ, նա նշել է, որ եթե Թուրքիայում գտնվող հայ քաղաքացիները խնդիրներ կունենան կապված հայրենիք վերադառնալու կամ այլ հարցերի հետ, կարող են դիմել Պաշտպանին, ով կփորձի միջամտել՝ քաղաքացիներին օգնելու համար:
«ՀՀ մարդու իրավունքների պաշտպանը կարող է դիմել Օմբուդսմենների միջազգային ինստիտուտին, թեև այն լծակ չունի ստիպելու Թուրքիայի ՄԻՊ-ին՝ որևէ քայլ կատարել, այնուամենայնիվ բարի կամքի դրսևորումը չի բացառվում:
ՄԻՊ-ը կարող է դիմել նաև մարդու իրավունքների պաշտպանությամբ զբաղվող միջազգային տարբեր կառույցներին, որոնք հնարավորության դեպքում կմիջամտեն՝ թուրքական պետության հետ ծագած հարցերը լուծելու համար»,- ասել է Եգանյանը:
Հուլիսի լույս 16-ի գիշերը հայտնի դարձավ Թուրքիայում պետական հեղաշրջման փորձի մասին: Պետական հեռուստատեսությունը հայտնել է, որ երկիրը այսպես կոչված «Խաղաղ խորհրդի» կառավարման տակ է գտնվում: Նախագահ էրդողանը կոչ է արել իր կողմնակիցներին դուրս գալ փողոց:
Հեղաշրջման փորձի ընթացքում սպավել է հեղաշրջման 16 կազմակերպիչ: Որոշ աղբյուրներ հայտնում են բանակում ձերբակալությունների ու պաշտոնանկությունների մասին` մասնավորապես, պաշտոնանկ է արվել 5 գեներալ և 29 գնդապետ:
Թուրքիայի նախագահ Ռեջեփ Թայիփ Էրդողանը հայտարարել է, որ իշխանությունները վերահսկում են երկրում տիրող իրավիճակը:
Զոհերի թիվն ավելի քան 100 է վերջին տվյալներով, փոխանցում է Anadolu-ն: Եվս 1154 մարդ վիրավոր է: Ավելի քան 1500 մարդ ձեռբակալվել է:
Նախնական տեղեկություններով Թուրքիայում տեղի ունեցած իրադարձությունների ժամանակ ՀՀ քաղաքացիներ կամ հայեր չեն տուժել։ Այս մասին հայտնում է ՀՀ ԱԳՆ նախարարությունը:
Ավելի վաղ արտգործնախարարությունը տեղեկացրել էր, որ Թուրքիայի տարածքում աջակցության կարիք ունեցող ՀՀ քաղաքացիները պետք է դիմեն ՀՀ ԱԳՆ։
«Այլ երկիր մեր շահերը Թուրքիայում չի ներկայացնում», – Twitter-ի իր միկրոբլոգում հայտնել է ՀՀ ԱԳՆ մամուլի խոսնակ Տիգրան Բալայանը:
Արտգործնախարարությունը նաև տեղեկացրել է, որ Թուրքիայում տեղի ունեցած իրադարձություններից տուժած ՀՀ քաղաքացիների համար ՀՀ ԱԳՆ-ում ստեղծվել է թեժ գիծ՝ +374 60 620552: Հնարավոր է կապ հաստատել հետևյալ էլ.փոստի հասցեով՝ [email protected], ինչպես նաև ԱԳՆ սոցիալական ցանցերի միջոցով։
