Ստամբուլում օգոստոսի 1-ին և 2-ին կշարունակվեն պոլսահայ լրագրող, Ստամբուլի հայկական «Ակոս» պարբերականի հիմնադիր և նախկին խմբագիր Հրանտ Դինքի սպանության գործով դատական նիստերը:
Այս առիթով Ստամբուլում «Հրանտի ընկերներ» նախաձեռնության անդամները հանդես են եկել հատուկ կոչով՝ հիշեցնելով, որ իրենք հետևելու են դատական գործընթացին՝ մինչև չպատժվեն բոլոր մեղավորներն ու պատասխան չտան սպանության գլխավոր պատվիրատուները, հաղորդում է «Ակոսը»:
«Երկիրն այն վիճակին է հասել, որ ձերբակալվում են իրավապաշտպանները, մեր իրավունքը պաշտպանողները, իսկ ամեն օր իշխանամետ քարոզչական վերնագրերով լույս տեսնող բազմաթիվ թերթեր սևացնում են մեր երկրի մամուլի պատմությունը», -ասվում է հայտարարության մեջ:
Հրանտ Դինքը սպանվել է 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է արդեն 10 տարի և դեռևս չի գտել իր հանգուցալուծումը:
