Հայաստանի համար շահավետ է Ռուսաստանի բարեկամը լինել, այսօր հայտարարել է Հայաստանի վարչապետ Սերժ Սարգսյանը Ռուսաստանի կառավարության ղեկավար Վիկտոր Զուբկովի հետ հանդիպման ավարտին կայացած մամլո ասուլիսի ժամանակ: «Հայ-ռուսական հարաբերությունները ոչ միայն հարուստ պատմություն ունեն եւ լավ ներկա, այլ նաեւ լավ հեռանկարներ ապագայի համար: Հայաստանը հազարավոր կապերով է կապված Ռուսաստանի հետ եւ Հայաստանի համար շահավետ է Ռուսաստանի բարեկամը լինել»,-ասել է Սարգսյանը:
Նրա խոսքերով, ռուսական կապիտալը իրեն լավ է զգում Հայաստանում: «Զուբկովի հետ հանդիպման ընթացքում մենք խոսել ենք մեր հարաբերությունները շարունակելու մտադրությունների մասին: Այսօր անտեղին է խոսել Ռուսաստանի հետ այլ հարաբերությունների մասին»,-ասել է Հայաստանի վարչապետը` հավելելով, որ երկկողմ կապերը հետագայում եւս կամրապնդվեն, հաղորդում է «Նովոստի-Արմենիան»:
