Հայաստանի կառավարությունը ջրամատակարարման սակագնի թանկացումը սուբսիդավորելու նպատակով 1,289 մլրդ դրամ կհատկացնի Ջրային տնտեսության պետական կոմիտեին: Այս մասին Ազգային ժողովում հայտարարել է ՀՀ ֆինանսների նախարար Վարդան Արամյանը:
Նա նշել է, որ սուբսիդավորումը իրականացվելու է փուլային տարբերակով:
«2018-ին սուբսիդավորումը իրականացվելու է այնպես, որ ՀՀ բոլոր քաղաքացիները չզգան թանկացման բեռը, իսկ 2019-ին թիրախավորվելու է սոցիալապես անապահով խավը», – ասել է Արամյանը:
Նոյեմբերի 22-ին Հանրային ծառայությունները կարգավորող հանձնաժողովը բավարարեց «Վեոլիա ջուր» ընկերության կողմից խմելու ջրի մատակարարման և ջրահեռացման ծառայությունների մատուցման սակագինը 11,4 դրամով բարձրացնելու հայտը:
Ավելի ուշ կառավարությունը հաստատեց 2018 թվականի հունվարի մեկից թանկացող ջրի սակագնի դիմաց բաժանորդներին սուբսիդավորելու որոշման նախագիծը:
