Սեպտեմբերի 20-ին կայացել է տեղեկատվական անվտանգության հայեցակարգի իրականացումը համակարգող միջգերատեսչական հանձնաժողովի հերթական նիստը, որը վարել է հանձնաժողովի նախագահ, ՀՀ Ազգային անվտանգության խորհրդի քարտուղար Արթուր Բաղդասարյանը:
Քննարկվել է հանձնաժողովի նախորդ նիստի որոշումների կատարման ընթացքը, մասնավորապես` հանձնաժողովի անդամները ներկայացրել են տեղեկատվական անվտանգության հայեցակարգի իրականացման ուղղությամբ կատարված աշխատանքները:
Արթուր Բաղդասարյանը նշել է, որ վերջին տարիներին Հայաստանում ընդլայնվել է ինտերնետ տարածվածության աստիճանը, տեղեկատվական անվտանգության հայեցակարգի հաստատումից հետո ազգային անվտանգության ծառայության և պետական մյուս լիազոր մարմինների կողմից ձեռնարկված միջոցառումների շնորհիվ էականորեն բարձրացել է պետական մարմինների պաշտոնական կայքերի պաշտպանվածության մակարդակը: «Այսօր արդեն կարող ենք արձանագրել, որ մեր պետական մարմինների կայքերը հուսալիորեն պաշտպանված են»,-ասել է Արթուր Բաղդասարյանը:
Հանձնաժողովն անդրադարձել է Հայաստանի տեղեկատվական անվտանգության ապահովման ոլորտում կադրերի պատրաստման և վերապատրաստման ծրագրին, որը նախատեսվում է ներդնել հաջորդ տարվանից: Տեղեկատվական անվտանգության ոլորտում ազգային օրենսդրությունը միջազգային չափանիշներին համապատասխանեցնելու նպատակով կատարված մոնիթորինգի արդյունքում արձանագրվել է համապատասխան օրենսդրական և ենթաօրենսդրական ակտերի ընդունման անհրաժեշտությունը:
Նիստում որոշվել է մշակել Հայաստանում ռադիոսարքավորումների սերտիֆիկացման կարգը, որի ընդունումն էականորեն կբարելավի այս ոլորտում Հայաստանի տեղեկատվական անվտանգության մակարդակը, հաղորդում է ՀՀ ԱԱԽ քարտուղարի մամլո գրասենյակը:
