Փետրվարի 17-ին Երևանում ԵԱՀԿ աջակցությամբ կազմակերպված քննարկման առանցքում էին Հայաստանում կրոնի կամ դավանանքի ազատությունը կարգավորող օրենսդրական դաշտին առնչվող խնդիրները: «Գործընկերություն հանուն բաց հասարակության» եւ ՄԱԿ-ի Հանրային տեղեկատվական վարչության երևանյան գրասենյակի հետ համատեղ կազմակերպված միջոցառմանը մասնակցեցին պետական կառույցների, քաղաքացիական հասարակության և կրոնական կազմակերպությունների, միջազգային հանրության ներկայացուցիչներ:
Միջոցառման մասնակիցները քննարկեցին Հայաստանում կրոնի կամ դավանանքի ազատության կարգավորման դաշտի մարտահրավերները և ներկայիս իրավիճակը, խղճի ազատության և կրոնական կազմակերպությունների մասին օրենքի, ինչպես նաև հարակից օրենքների վերջին փոփոխությունները, Վենետիկի հանձնաժողովի եւ ԵԱՀԿ / ԺՀՄԻԳ 2010 թ, միջանկյալ համատեղ եզրակացությունը, նաև 2009թ. համատեղ եզրակացությունը:
«Այս քննարկման նպատակն է նպաստել Հայաստանի ջանքերին` կրոնի կամ դավանանքի հիմնավոր օրենսդրություն պատրաստելու գործում»,-ասել է ԵԱՀԿ երևանյան գրասենյակի ղեկավար, դեսպան Սերգեյ Կապինոսը:
Միջազգային փորձագետները ներկայացրեցին վերլուծության արդյունքները և իրավական կարծիքում ամփոփված առաջարկները, ինչպես նաև դիտարկեցին օրենսդրությունը միջազգային չափանիշներին համապատասխանեցնելու ուղիները:
ՀՀ արդարադատության նախարար Հրայր Թովմասյանը իր բացման ելույթում նշեց. «Մենք պատրաստակամ ենք օգտվել Վենետիկի հանձնաժողվի փորձագիտական խորհրդատվությունից և աջակցությունից: Օրենսդրական փաթեթի վերջնական տարբերակները պատրաստ լինելուն պես` կրկին կներկայացվեն Վենետիկի հանձննաժոովի փորձագետների դիտարկմանը»:
