Marriott Bonvoy-ը դադարեցրել է դեպի Արցախ նախատեսված վիճահարույց զբոսաշրջային փաթեթի առաջարկը՝ հայկական կազմակերպությունների և իրավապաշտպանների նախաձեռնած միջազգային հնգօրյա բողոքի արշավից հետո, հայտնել է Ամերիկայի Հայ դատի հանձնախումբը (ANCA)։
Խոսքը մոտ 14 ժամ տևողությամբ շրջագայության մասին էր, որը ներառում էր այցելություններ Ադրբեջանի վերահսկողության տակ գտնվող Շուշի և Ստեփանակերտ քաղաքներ։ Փաթեթը հասանելի էր ամրագրման համար Marriott-ի զբոսաշրջային ծառայությունների հարթակում, իսկ օգտատերերը դրա դիմաց կարող էին ստանալ Marriott Bonvoy-ի բոնուսային միավորներ, գրում է «Փաստինֆոն»:
ANCA-ի տեղեկացմամբ՝ առաջարկի նկարագրության մեջ բացակայում էին հիշատակումներ Արցախի հայկական պատմության, Ադրբեջանի կողմից իրականացված շրջափակման, ռազմական գործողությունների և հայկական բնակչության բռնի տեղահանման մասին։
Շրջագայության ծրագրում ընդգրկված էր նաև Ստեփանակերտի «Մենք ենք, մեր սարերը» հուշարձանը, որը ներկայացվել էր որպես տարածաշրջանային քարե արվեստի և ճարտարապետության օրինակ՝ առանց որևէ հիշատակման դրա հայկական ծագման վերաբերյալ։
Հաղորդագրության համաձայն՝ խնդիրը հուլիսի 27-ին առաջինը հրապարակայնացրել էր Հայկական հետազոտությունների և վերլուծությունների կենտրոնը (CARA)։ Դրանից հետո ANCA-ն, տարբեր երկրներում գործող հայկական կազմակերպությունները, գործընկեր կառույցներն ու լրատվամիջոցները սկսել էին համակարգված բողոքի արշավ։
ANCA-ի գործադիր տնօրեն Արամ Համբարյանը հայտարարել էր, որ Marriott-ը չպետք է շահույթ ստանար Արցախի հայ բնակչության տեղահանման և դրա հետևանքների հաշվին։
Կազմակերպության տվյալներով՝ միջազգային արձագանքից հետո Marriott-ը հինգ օրից էլ կարճ ժամանակում հեռացրել է վիճահարույց զբոսաշրջային փաթեթը։ Ընկերությունը մինչ այժմ առանձին հրապարակային պարզաբանում չի ներկայացրել առաջարկը հանելու պատճառների վերաբերյալ։
