«Ադեկվադ» միաբանության անդամ, իրավաբան Գարեգին Պետրոսյանն ֆեյսբուքյան իր էջում անդրադարձել է միաբանության համահիմնադիր Արթուր Դանիելյանի տեսակցությունների և հեռահաղորդակցության ամբողջական արգելքին՝ իրավական դիտարկումներ ներկայացնելով դրա համաչափության վերաբերյալ:
«Կալանավորման որոշման հետ միաժամանակ քննիչի որոշմամբ Ա. Դանիելյանի նկատմամբ սահմանվել է տեսակցությունների և հեռահաղորդակցության ամբողջական արգելք (բացառությամբ փաստաբանների հետ հաղորդակցության)։
- Ապացույցների բնույթը և ռիսկերի բացակայությունը
Քրեական դատավարությունում տեսակցությունների արգելքի իրավական նպատակն է թույլ չտալ, որ մեղադրյալը թաքցնի ապացույցները կամ ազդի վկաների վրա։ Տվյալ դեպքում մեղադրանքի հիմքում ընկած են արդեն իսկ արված հրապարակային գրառումները, որոնք քննչական մարմինն արձանագրել և ներբեռնել է: Ուստի, ընտանիքի անդամների միջոցով թվային ապացույցները «ոչնչացնելու» կամ փոփոխելու որևէ առարկայական ռիսկ գոյություն չունի։
- Մարդու իրավունքների եվրոպական դատարանի նախադեպային իրավունքի խախտումը
Մարդու իրավունքների եվրոպական դատարանի կայուն պրակտիկայի համաձայն (ՄԻԵԿ 8-րդ հոդված՝ անձնական և ընտանեկան կյանքը հարգելու իրավունք)՝ կալանավորված անձի՝ արտաքին աշխարհից և ընտանիքից լիակատար մեկուսացումն անթույլատրելի է, եթե խոսքը չի վերաբերում ահաբեկչությանը կամ կազմակերպված հանցավորությանը։ Քննիչի կողմից արգելքի ավտոմատ (մեխանիկական) կիրառումը՝ առանց հստակ փաստական հիմնավորման, թե ինչպես կարող է ընտանիքի հետ կապը վնասել քննությանը, որակվում է որպես անհամաչափ սահմանափակում և լրացուցիչ ճնշման միջոց»,-ասվում է գրառման մեջ:
Հայաստանում գործող քաղաքացիական հասարակության 11 կազմակերպություն հանդես է եկել համատեղ հայտարարությամբ՝ պահանջելով վերացնել Դանիելյանի կալանքը և դադարեցնել հետապնդումը:
Հայտարարության հեղինակները խիստ մտահոգություն են արտահայտել այն կապակցությամբ, որ Դանիելյանի նկատմամբ քրեական հետապնդում է իրականացվում համացանցում հրապարակված գրառումների համար՝ կալանքը համարելով անհամաչափ և քաղաքականապես մոտիվացված:
