Հոկտեմբերի 28-ից նոյեմբերի 3-ն ընկած ժամանակահատվածում Երևանի Կենտրոն և Արաբկիր վարչական շրջաններում արձանագրվել են օդում փոշու սահմանային թույլատրելի կոնցենտրացիայի գերազանցումներ։ Հիդրոօդերևութաբանության և մոնիթորինգի կենտրոնը հրապարակել է մայրաքաղաքի մթնոլորտային օդի որակի դիտարկումների արդյունքները:
Մասնավորապես, փոշու սահմանային թույլատրելի կոնցենտրացիայի գերազանցումներ են արձանագրվել Կենտրոն վարչական շրջանում՝ հոկտեմբերի 31-ին, ինչպես նաև նոյեմբերի 1-ին, 2-ին և 3-ին։
Արաբկիր վարչական շրջանում փոշու բարձր պարունակություն է գրանցվել հոկտեմբերի 29-ին և նոյեմբերի 1-ին։
Միևնույն ժամանակ, Շենգավիթ և Նոր Նորք վարչական շրջաններում փոշու պարունակության սահմանային թույլատրելի ցուցանիշների գերազանցումներ չեն արձանագրվել։
Օդի որակի ուսումնասիրությունների ընթացքում գնահատվել է նաև ազոտի երկօքսիդի առկայությունը մթնոլորտում։ Ըստ հրապարակված տվյալների՝ այս նյութի կոնցենտրացիան սահմանված թույլատրելի մակարդակը գերազանցել է Կենտրոն վարչական շրջանում՝ հոկտեմբերի 28-ին։
Արաբկիրում, Շենգավիթում և Նոր Նորքում ազոտի երկօքսիդի պարունակությունը պահպանվել է թույլատրելի սահմաններում, և գերազանցումներ չեն գրանցվել։
Ինչ վերաբերում է ծծմբի երկօքսիդին, ապա դիտարկումների ամբողջ ժամանակահատվածում դրա պարունակությունը չի գերազանցել սահմանային թույլատրելի կոնցենտրացիան։
