Ստեփանավան համայնքի նորընտիր ավագանու նիստում համայնքապետ է ընտրվել «Գործարար» կուսակցության ցուցակը գլխավարող Արմեն Գրիգորյանը:
Գրիգորյանը տեղական ինքնակառավարման մարմինների ընտրություններին մասնակցել է «Գործարար» կուսակցության ընտրական ցուցակով և հաղթանակ տարել։
Նիստի սկզբում ներկաները մեկ րոպե լռությամբ հարգել են «Նուբարաշեն» ՔԿՀ–ում հանկարծամահ եղած՝ Ստեփանավանի համայնքապետի թեկնածու Արսեն Գևորգյանի հիշատակը, հայտնում է Sputnik Արմենիան:
Ստեփանավանի համայնքապետի ընտրության նիստին ներկա չէին ընդդիմադիր «Ուժեղ Հայաստան» կուսակցության ավագանու 4 անդամները։ Նրանք նշել են, որ կուսակցությունը վերցրել է ավագանու 4 մանդատները, սակայն ներկայացուցիչներն այսօր չեն մասնակցել նիստին՝ Գևորգյանի մահվան պատճառով։
Նոյեմբերի 10-ին քրեակատարողական հիմնարկում սրտամկանի ինֆարկտի հետևանքով մահացել է «Ուժեղ Հայաստան» կուսակցության՝ Ստեփանավանի համայնքապետի թեկնածու Արսեն Գևորգյանը։ Վերջինս ընտրություններից առաջ կալանավորվել էր երկու ամիս ժամկետով։
