Ապրիլի 7-13-ը Հայաստանի պետական ճարտարագիտական համալսարանի գլխավոր մասնաշենքում կկայանա «Մարդը և տիեզերքը» հանրապետական ֆիլատելիստական ցուցահանդեսը:
Ցուցահանդեսի կազմակերպիչներն են Հայաստանի Ֆիլատելիստների միությունը (ՀՖՄ), Հայաստանի պետական ճարտարագիտական համալսարանը (Պոլիտեխնիկ) և ՀԱՅՓՈՍՏ ընկերությունը:
«Հայկական ֆիլատելիան ունի հարուստ և բարի ավանդույթներ՝ միջազգային և հանրապետական ցուցահանդեսների կազմակերպման առումով: Վստահ եմ, որ այս ցուցահանդեսը մի նոր էջ կբացի Հայաստանում ֆիլատելիայի զարգացման համար», – ասել է ՀՖՄ նախագահ Հովիկ Մուսայելյանը:
«Մենք առաջին անգամ չէ որ, ՀՖՄ-ի հետ համատեղ իրականացնում ենք հանրապետական և միջազգային նշանակության ցուցահանդեսներ: Նամականիշների որպես պետության խորհրդանիշներից մեկի մասին իրազեկության բարձրացումը կարևորագույն գործոն է երիտասարդության արժեքային համակարգի ձևավորման մեջ», – ասում է ՀՊՃՀ ռեկտոր Ոստանիկ Մարուխյանը:
Բացման արարողությանը ներկա կլինեն ՀՀ տրանսպորտի և կապի նախարար Մանուկ Վարդանյանը, այլ պաշտոնատար անձինք և պատվավոր հյուրեր:
Ցուցահանդեսի գլխավոր հովանավորն է «Կիլիկիա» գարեջրի գործարանը:
Հովանավորն է «Յունիքոմփ» ընկերությունը:
