Ոչ պաշտոնական տեղեկությունների համաձայն Նոր Ջուղայի Սբ. Ամենափրկիչ վանքի թալանի կապակցությամբ, Իրանի անվտանգության ուժերի կողմից 2-5 հայեր են ձերբակալվել Սպահանում, հայտնում է Թեհրանի «Արաքս» շաբաթաթերթը:
Առայժմ ոչ մի տեղեկություն չկա, թե արդյոք այս կապակցությամբ դիմում կատարվել է Ինտերպոլին, թանգարանային իրերը վաճառքի հանողներին ձերբակալելու թե ոչ: Անհայտ է նաև, թե արդյոք Սպահանի հայոց թեմի Թեմական խորհուրդը այս առթիվ որոշակի քայլերի դիմել է թե ոչ:
«Նոր Ջուղայում տարածվող լուրերի համաձայն, ձերբակալված կասկածյալների թիվը հինգ հոգի է, իսկ ավելի հավաստի աղբյուրները միայն երկու հոգու մասին են խոսում, որոնցից մեկը կին է: Նույն աղբյուրի հաղորդմամբ, այս պահին մեղադրվողները մեկ միլիարդ ռիալ (մոտ 85 հազար ԱՄՆ դոլլար) երաշխիքի դիմաց գտնվում են ազատության մեջ»,- հայտնում է թերթը:
Այսօրվա դրությամբ դեռ պարզ չէ` որտեղ են գտնվում կողոպտված թանգարանային իրերը կամ գտնվել են, թե ոչ: Սակայն ասվում է, որ, ըստ երևույթին, սրբապատկերները երկրից դուրս չեն տարվել, «այլ միայն նրանց պատկերներով են թալանողները Լոնդոնում հետաքրքրվել` «ավարի» արժեքը ճշտելու համար»:
ՍՀԹ Թեմական խորհուրդը ցայսօր պաշտոնական ոչ մի տեղեկատվություն չի հրապարակվել ձերբակալությունների կապակցությամբ և շարունակում է լռել:
