Հայ երիտասարդների տարբեր խմբավորումներն ու հասարակական կազմակերպությունները բազմիցս փորձել են իշխանությունների, համապատասխան գերատեսչությունների ու նախարարությունների ուշադրությունը հրավիրել պատմամշակութային արժեքների ու վանքերի, սրբավայրերի պահպանության վրա: Նրանք տարբեր ակցիաներ էին կազմակերպում, սլայդշոուներ պատրաստում, պահանջում էին ու խնդրում հոգալ, պահպանել, գոնե` չվնասել հուշարձանները:
Բայց այդ ամբողջը կարծես անհետևանք ու առանց արձագանք մնացին: Թերևս դա է պատճառը, որ երիտասարդները, իշխանություններից հույսը կտրելով, այս անգամ արդեն դիմում են գործարարներին ու հենց նրանց խնդրում հոգալ նույն այդ սրբավայրերի մասին:
Ջուրը, լույս, օդանավակայան, մոլիբդենի հանքեր… այս բոլոր ոլորտներում արդեն մի քանի տարի է արտասահմանյան ներդրումներ են կատարվում և ոլորտները, կարող ենք միանշանակ ասել, հենց այդ ներդրումների շնորհիվ են զարգանում: Գուցե այս անգամ էլ շարունակե՞նք այդ «բարի ավանդույթը», ու եթե հայ գործարարները չարձագանքեն, ինչում գրեթե կասկած չկա, ներդրումներ կատարելու հրավիրենք արտասահմանցի բարերարներին: Նրանք էլ փող կներդնեն, կվերականգնեն… թեկուզ` մուտք փողով դառնա: Երևի դա է միակ ելքը. գոնե այդ ճանապարհով ու այդ գնով դարերից եկածը կպահպանենք ու կփոխանցենք հաջորդ սերունդներին…
