Երևանի պետական համալսարանում այսօր Մոսկվայի Բաումանի անվան պետական տեխնիկական համալսարանի «Կրթական տեխնոլոգիաների փոխանցումը ԱՊՀ երկրների տեխնիկական համալսարաններ» ծրագրի շրջանակում բացվել է հեռահար մուտքի կետ:
Բացմանը նախորդել է 72 ակադեմիական ժամ տևողությամբ «Տեղեկատվության պաշտպանությունը տեղեկատվական համակարգերում» որակավորման բարձրացման դասընթացի հեռակա անցկացումը: Դասընթան անցել են ԵՊՀ 21 աշխատակիցներ` տեղեկատվական-հաղորդակցական տեխնոլոգիաների կիրառմամբ:
«Վստահ եմ, որ մեր աշխատակիցներից շատերն արդեն կիրառում են ստացված գիտելիքներն ամենօրյա պրակտիկայում»,- այսօր հեռահար մուտքի կետի բացման ժամանակ ասաց ԵՊՀ պրոռեկտոր Ալեքսանդր Մարկոսյանը:
Այս պահին հեռավար մուտքի կետում հասանելի են որակավորման բարձրացման հեռահար ուսուցման 56 ծրագրեր հետևյալ ուղղություններով` կենսաբժշկական տեխնիկա ու առողջության պահպանման տեխնոլոգիաներ, տեղեկատվական համակարգեր ու տեխնոլոգիաներ, արբանյակային կապի ռադիոէլեկտրոնային համակարգեր ու կառավարում, ծրագրերի ղեկավարում:
Որակավորման բարձրացման հեռահար ուսուցման ծրագրերի թիվը պլանավորվում է հետագայում հասցնել 200-ի:
