Օգոստոսի 19-ին Հայաստանի եւ Ադրբեջանի զինված ուժերի շփման գծում ԵԱՀԿ դիտարկման ձախողման ողջ պատասխանատվությունը Հայաստանի պաշտպանության նախարարությունը դնում է ադրբեջանական կողմի վրա: Այդ մասին «Արմինֆո» գործակալությանն է հաղորդել Հայաստանի զինված ուժերի գլխավոր շտաբի պետ, պաշտպանության փոխնախարար գեներալ-գնդապետ Միքայել Հարությունյանը: Նրա խոսքերով, անցկացված հետաքննության արդյունքում պարզվել է, որ դիտարկման ընթացքում իրոք կրակոց է արձակվել որսորդական հրացանից: Կրակողը եղել է սովորական որսորդ, իսկ կրակոցը հնչել է սահմանից երեք կիլոմետր հեռավորության վրա, որից հետո ադրբեջանցիները կրակ են բացել: «Հայկական կողմից ոչ մի կրակոց չի եղել, ինչը հաստատված է հետաքննությամբ, ինչպես նաեւ ԵԱՀԿ գործող նախագահի անձնական ներկայացուցիչ Անջեյ Կասպրշիկի դաշտային օգնականների կողմից», – ընդգծել է Մ. Հարությունյանը: «Ադրբեջանական կողմը միակողմանի կարգով խախտել է դիտարկման ընթացքում անվտանգության ապահովման շուրջ պայմանավորվածությունը», – հայտարարել է Հարությունյանը, ավելացնելով, որ մոտ ժամանակներս Հայաստանի պաշտպանության նախարարությունը համապատասխան փաստաթուղթ կներկայացնի Ա.Կասպրշիկին:
Հայաստանի առաջին և ամենահին առցանց մեդիան՝ 2000 թվականից։
Ապագան պայծառ է և եռագույն™
Իմ PANը
