Հայաստանի կինոլոգիական միության նախագահ Վիոլետա Գաբրիելյանը լրագրողների հետ հանդիպման ժամանակ նշեց, որ իրենք ցանկանում են հայկական գամփռին, որպես ամենահնագույն գելխեղդի, գրանցեն ՅՈՒՆԵՍԿՕ –ում:
«Քանի որ վերջերս «Սասնա ծռեր» էպոսն ընդգրկվեց ՅՈՒՆԵՍԿՕ-ի ոչ նյութական ժառանգության ցուցակում, մենք ցանկանում ենք, որ գամփռն էլ գրանցվի, որպես Հայաստանի ազգային տեսակ: Հայկական գամփռով հետաքրքրված են ողջ աշխարհում: Մենք դիմել ենք Տիգրան Սարգսյանին և Տարոն Մարգարյանին, և նրանք խոստացել են օժանդակել մեզ»,- ասել է Գաբրիելյանը: Ըստ նրա, 2012 թվականը շատհաջող էր Հայաստանի կինոլոգիական միության համար: Հայկական շները մասնակցել են բազմաթիվ մրցաշարերի և մեծ հաջողություններ են արձանագրել:
Դեկտեմբերի 8-9-ը Գաբրիելյանը Մոսկվայում անցկացված քաղաքապետի գավաթում և աշխարհի առաջնությունում մրցավար է եղել: Նա միակն է Հայաստանում, որ միջազգային կարգի մրցավարի կոչում ունի, այն ստացել է 2010 թվականի Եվրոպայի առաջնության ժամանակ: «Շատ եմ ցանկանում, որ Հայաստանում մրցավարների թիվն ավելանա, ես կանեմ ամեն ինչ, նրանց օգնելու համար»,- նշել է նա:
Կինոլոգիական միության նախագահի խոսքով, ցավալի է, որ իրենք չեն կարողացել ԱԱ ներկայացնել գամփռին, քանի որ շներին ինքնաթիռով մրցավայր հասցնելը բավականին գումար է պահանջում:
Հայաստանի կինոլոգիական միության ներկայացուցիչները ասուլիսի ժամանակ ներկայացրել են 5 ամսական Գայդա անունով գամփռին:
