ՀՀ նախագահական ընտրությունների քարոզարշավի ընթացքում ամենաքննակվող թեմաներից մեկը ՀՀԿ թեկնածու Սերժ Սարգսյանի մի քանի արտահայտություներն էին, որոնք արդեն հասցրել են մեմեր դառնալ: «Եկել ես ստեղ, որ ինչ անես»-ը, «թարս աճած վարունգն» ու մի քանի այլ արտահայտություններ մինչ օրս էլ համացանցում ամենաշատը հանդիպողներն են: Քաղտեխնոլոգ Կարեն Քոչարյանը այս ամենին որպես բացատրություն երեք տարբերակ ունի:
Այսօր լրագրողների հետ հանդիպման ժամանակ նա ասաց, որ դա նախ կարող էր պատահական լինել: Հնարավոր է, որ արվում է թեկնածուի վարկանիշն իջեցնելու համար, իսկ երրորդ տարբերակն այն է, որ նման «կիքսեր» թույլ տալով՝ փորձում է հանրության ուշադրությունը հրավիրել ընտրությունների վրա, որ հետաքրքիր անցնի: «Չեմ կարծում, որ Սերժ Սարգսյանի նման քաղաքական գործիչը քարոզարշավի կեսից սկսած ինչ-որ մի բան ասի, որ դառնա օրվա հիթը: Ինքը գիտի բառի արժեքը: Ես կարծում եմ, որ այննտեղ ինչ-որ բան կա դրած, չի կարող այնպես լինել, որ ամեն օր նման բան պատահի»,- ասաց Կարեն Քոչարյանը:
Քարոզարշավի կեսից Սերժ Սարգսյանի հանդիպումների ժամանակ ամեն անգամ միջադեպեր են տեղի ունենում: Առաջին անգամ դա տեղի ունեցավ Եռաբլուրում՝ երբ նրան լաց լինելով մի կին մոտեցավ, Սերժ Սարգսյանն էլ պատասխանեց՝ «Եկել ես ստեղ, լաց ես լինում, մեր տոնը փչացնում ես, որ ի՞նչ անես»:
