Հունիսի 12-ին լրացավ ազգային հերոս Մոնթե Մելքոնյանի զոհվելու 20-ամյա տարելիցը: Այս կապակցությամբ` Մոնթեի կյանքն ու գործունեությունը հիշելու, նրա գաղափարներին ծանոթանալու համար «Մոնթե Մելքոնյան» հիմնադրամը վաղը` ժամը 19:00-ին, Երևանի Հ. Թումանյանի անվան Պետական Տիկնիկային Թատրոնում անցկացնելու է Մոնթե Մելքոնյանին նվիրված «Սա իմ վերջին պայքարը չէ» խորագրով միջոցառումը:
Մինչ միջոցառումը կլինի այց Եռաբլուր` Մոնթեի շիրիմին: Եռաբլուր այցը կմեկնարկի 15:30-ին, Եռաբլուրի կամարի մոտից: Այցի մասնակիցներին կտրվեն միջոցառման համար պատրաստված շապիկներ:
«Միջոցառման նպատակն է հանրությանը և հատկապես երիտասարդությանը ներկայացնել Մոնթեի անցած ուղին, բացահայտել նրան ամենատարբեր տեսանկյուններից` որպես զինվոր, բնապահպան, ռազմավարագետ և այլն: Այն իր մեջ կրում է Մոնթեի պայքարը շարունակելու պատգամը այսօրվա սերնդին փոխանցելու գաղափարը:
Այդ օրը մենք հնարավորություն կունենանք լսելու Մոնթեի մարտական ընկերների, ինչպես նաև Մոնթեի կնոջ` Սեդա Գպրանյան-Մելքոնյանի խոսքն ու պատմությունները: Ելույթ կունենան նաև գուսան Հայկազունը և «Կարին» ազգագրական համույթը:
«Սա իմ վերջին պայքարը չէ» միջոցառման շրջանակներում պատրաստվել է գրքույկ, որը միջոցառման ավարտին կտրվի ներկաներին: Դրանում ներկայացված է հատվածներ Մոնթեի կողմից գրված հոդվածներից ու աշխատություններից, ինչպես նաև նրան նվիրված մի շարք գրքերից: Բացի գրքույկից ներկաները նաև հնարավորություն կունենան ծանոթանալու Մոնթեի անտիպ հոդվածներից մեկին»,- ասված է կազմակերպիչների տարածած հաղորդագրության մեջ:
