Սենտոր Ջեք Ռիդը չի պատրաստվում պաշտպանել Ռիչարդ Հոգլանդի թեկնածությունը Հայաստանում ԱՄՆ դեսպանի պաշտոնում մինչեւ չստանա Ջոն Էվանսի ետ կանչման հետ կապված հարցերի պատասխանները: Ինչպես հայտնում է Ամերիկայի Հայ Դատի հանձնախումբը (ANCA), հուլիսի 26-ին Ռոդ-Այլենդից սենատորը գրավոր հարցում է հղել ԱՄՆ Պետքարտուղար Քոնդոլիզա Ռայսին` պահանջելով բացատրել Ջոն Էվանսին ժամանակից շուտ ետ կանչելու հետ կապված իրավիճակը: Հարցման մեջ ասվում է. «Եթե «ցեղասպանություն» տերմինն ընդունված լիներ 1900-ական թվականներին, ապա նա իրավունք կունենա՞ր 1915 թվականի իրադարձությունները հենց ցեղասպնություն անվանել»:
Ռայսին ուղղված հարցերի շարքում սենատորը խնդրում է ճշտել` արդյոք գոյություն ունի Պետդեպարտամենտի գրավոր կամ բանավոր կարգադրություն` «ցեղասպանություն» տերմինը չօգտագործելու վերբարեյլ եւ ինչու, ըստ ԱՄՆ-ի քաղաքականության, Օսմանյան Թուրքիայում 1,5 միլիոն հայերի սպանությունը չի բնութագրվում այդ տերմինով: «Սենատի արտասահմանյան հարցերով հանձնաժողովում լսումների ժամանակ Հոգլանդն ասել է, որ պարզապես ծառայում է նախագահին եւ պաշտպանում է նրա քաղաքականությունը»,- գրում է սենատոր Ռիդը: Նա նաեւ հիշեցրեց պետքարտուղարի տեղակալ Մեթյու Բրայզայի խոսքերն այն մասին, որ «դեսպանները ծառայում են նախագահին եւ հետեւում են նրա քաղաքականությանը»:
