Սենատորներ Ռոբերտ Մենենդեզը եւ Գարի Րիդը կոչ են արել ԱՄՆ նախագահ Ջորջ Բուշին Հայաստանում դեսպանի պաշտոնում ԱՄՆ Սենատի կողմից «սառեցված» Ռիչարդ Հոգլանդի թեկնածության փոխարեն նոր թեկնածու առաջադրել, հաղորդում է Ամերիկայի Հայ Դատի Հանձնախումբը (ANCA): 2006 թվականի դեկտեմբերի 1-ին պետքարտուղար Կոնդոլիզա Ռայսին հղված նամակում, սենատորները Հայաստանում դեսպան նշանակելու գործընթացը արագացնելու համար առաջարկել են նոր թեկնածու ներկայացնել «այդքան կարեւոր պաշտոնի համար»: Սենատորի խոսքերով, ԱՄՆ հայ համայնքի ամուր դիրքորոշումը այս նշանակման դեմ ծառայում է Ամերիկայի ազգային շահերին:
«ԱՄՆ հայ համայնքը ողջունում է սենատորներ Մենեդեզի եւ Րիդի սկզբունքային դիրքորոշումը` ցեղասպանության ճանաչման, կանխարգելման եւ դատապարտման պարտավորությունների պաշտպանության հարցում: Սենատորները գիտակցում են պարզ ճշմարտությունը. Հայոց ցեղասպանության ժխտումը չի կարող արդյունավետ լինել ԱՄՆ շահերի պաշտպանության տեսանկյունից Հայաստանում. մի երկիր, որը Թուրքիայի կողմից դաժան տեղահանման եւ ոչնչացման է ենթարկվել»,- հայտարարել է ANCA-ի տնօրեն Կեն Խաչիկյանը:
Նշենք, որ հունվարին իր աշխատանքները կսկսի ԱՄՆ նոր Կոնգրեսը, որի մեծամասնությունը դեմոկրատներ են կազմում, որոնք դեմ են հանդես գալիս Հայոց ցեղասպանության մերժման Ջորջ Բուշի քաղաքականությանը: ԱՄՆ Սահմանադրության համաձայն, նախագահը կարող է նոր թեկնածություն ներկայացնել, կամ նորից առաջարկել Ռիչարդ Հոգլանդի թեկնածությունը` օգտվելով Կոնգրեսի աշխատանքի ընդմիջումից, նշանակել Հայաստանի դեսպանին առանց Սենատի հաստատման: Այդ դեպքում սաենատորները վետոյի իրավունք չեն ունենա:
