Փաստորեն, ոչ մի առաջընթաց չկա նոր որակի համակարգում հարավկովկասյան երկրները ներգրավելու վերաբերյալ տարածաշրջանի երկրների եւ համաշխարհային հանրության կողմից տարիներ շարունակ հռչակվող մտադրություններում: Այդ մասին PanARMENIAN.Net-ին տված հարցազրույցում հայտարարել է «Կովկաս» կենտրոնի վերլուծաբան Մանվել Սարգսյանը: «Այդ կապակցությամբ նկատելի են անհատական ակտիվացման փորձերը` Վրաստանը փորձում է հանգուցալուծել իր հարաբերությունները Ռուսաստանի հետ կտրուկ միջոցներով եւ ներգրավվել եվրոպական կառույցներում, Ադրբեջանի նախագահ Իլհամ Ալիեւը առաջ է քաշում Հայաստանի ամբողջական մեկուսացման ծրագիր, հույս ունենալով ստանալ միջազգային հանրության աջակցությունը: Հայաստանը փորձում է հավասարակշռել իր հարաբերությունները Արեւմուտքի եւ Ռուսաստանի հետ: Տարածաշրջանի երկրներից ոչ ոք չի հետաքրքրված հարեւաններով»,- նշել է նա:
Մ. Սարգսյանի խոսքերով, նման անհատական ակտիվացումն ուժեղացնում է տարածաշրջանի երկրների կախվածությունը այս կամ այն արտաքին գործոնից: «Արտաքին ուժերի շահերը գնալով ավելի են շփման մեջ մտնում տարածաշրջանի այս կամ այն երկրի հետ: Հակամարտող երկրների միջեւ փոխզիջումը գնալով բարդանում է: Ասենք, որքան շատ է Հայաստանի ղեկավարությունը խոսում լուրջ զիջումների գնալու իր պատրաստակամության մասին Լեռնային Ղարաբաղի հարցում, այնքան շատ է Ադրբեջանի ղեկավարությունը ուժեղացնում ռազմատենչ ճարտասանությունը: Ախորժակ է բացվում` արտաքին ուժերի միջոցով ստանալ ոչ թե մի մասը, այլ ամբողջը»,- ընդգծել է «Կովկաս» կենտրոնի վերլուծաբանը:
Միեւնույն ժամանակ, նա նկատել է, որ տարածաշրջանի երկրները իրական շեշտը դնում են ոչ թե փոխզիջման, այլ սեփական մտադրություններն իրականացնելու համար էքսկլյուզիվ արտաքին աջակցություն ստանալու վրա: «Նշված օրինակում Ադրբեջանի կողմից ռազմական ռեվանշի թեման գերազանցապես ընդգրկվում է անհրաժեշտ միջոցների առավել լայն շրջանակում, որ անհրաժեշտ են «տարածքները վերադարձնելու համար: Իլհամ Ալիեւը հոկտեմբերին հայտարարեց, թե բանակցային գործընթացի բացակայության դեպքում կքննարկի ցանկացած այլ տարբերակներ, սակայն ընդգծեց, որ «դա չի նշանակում, թե պետք է անմիջապես մտածել ռազմական գործողության մասին»: Այսինքն, առավել հստակ, քան նախկինում, նա նշեց, որ ռազմական գործողությունը վերջին քայլն է: Դրա համար ժամանակ է հարկավոր, որն, ըստ իրեն, Ադրբեջանի օգտին է աշխատում»,- ասել է Սարգսյանը:
