Արցախի Հանրապետության անկախության 25-ամյակին նվիրված հոբելյանական կոնյակի անվան համար առաջարկված 127 տարբերակից հանձնաժողովը ընտրել է հետևյալ 6 տարբերակը՝
1. Ազատագրող,
2. Ազատություն,
3. Ազատ,
4. Տիգրանակերտ,
5. Վերածնունդ,
6. Հաղթանակի համը:
Այս մասին տեղեկացնում է ԼՂՀ փոխվարչապետ Արթուր Աղաբեկյանը ֆեյսբուքյան իր էջում:
Փոխվարչապետն առաջարկում է մասնակցել «Արցախպրես» կայքում տեղադրված հարցմանը՝ քվեարկելով 6 տարբերակից որևէ մեկի օգտին:
ԼՂՀ կառավարությունը, 2016-ի ԼՂՀ անկախության 25-ամյակի առթիվ Երևանի Արարատ գինու կոնյակի գործարանի և Ստեփանակերտի գինու կոնյակի գործարանի հետ գործակցությամբ, թողարկելու է 10.000 շիշ՝ 25 տարեկան հոբելյանական կոնյակ, որի ամբողջ շահույթը ծախսվելու է ԼՂՀ Պաշտպանական բանակի կարողությունների բարձրացման վրա:
1991 թվականի դեկտեմբերի 10-ի հանրաքվեն պատմական իրադարձություն էր արցախցիների կյանքում, որը կանխանշեց երկրի հետագա զարգացման ուղին: ԼՂՀ-ում տեղի ունեցավ հանրաքվե, որի ժամանակ արցախահայությունը բացարձակ մեծամասնությամբ անկախ պետություն կերտելուն «այո» ասաց:
