Սանկտ-Պետերբուրգում Ադրբեջանի եւ Հայաստանի նախագահների միջեւ տրամադրվածությունը կառուցողական էր: Այդ մասին հայտարարել է ԵԱՀԿ Մինսկի խմբի ԱՄՆ-ը ներկայացնող համանախագահ Մեթյու Բրայզան: «Կհամաձայնեն արդյոք Ադրբեջանի եւ Հայաստանի նախագահները մեկ անգամ եւս հանդիպել հուլիսին, կախված կլինի այն բանից, թե առաջիկա շաբաթվա ընթացքում համանախագահներն ինչ առաջընթացի կհասնեն` սերտորեն համագործակցելով երկու երկրների արտգործնախարարների հետ», – նշել է նա:
Մեկնաբանելով Սանկտ-Պետերբուրգում նախագահների հանդիպումը, ամերիկացի դիվանագետը նշել է, որ հանդիպումը դրական ընթացք է ունեցել: «Համանախագահները գոհունակությամբ մատնանշել են երկխոսության գործընթացում նախագահների ձեռքբերած առաջընթացը: Այդ առաջընթացի հիման վրա մենք ձեռնամուխ ենք լինում դիվանագիտական խորհրդատվությունների նոր փուլին, որպեսզի օգնենք կողմերին մերձենալ հիմնարար սկզբունքների համաձայնեցման ավարտին», – ընդգծել է Բրայզան, հաղորդում է ԱՊԱ-ն:
