Թեհրանում բախումներ են տեղի ունեցել անվտանգության ուժերի եւ ցուցարարների միջեւ, որոնք չեն հնազանդվել բողոքի ցույցեր անցկացնելու արգելքին: Ականատեսները Associated Press-ի են հայտնել, որ չորեքշաբթի ցուցարարներին ցրելու համար ոստիկանությունը կիրառել է մահակներ եւ արցունքաբեր գազ:
Երկրի գերագույն առաջնորդ այաթոլլա Ալի Համենեին չորեքշաբթի հայտարարել է, որ պետությունը չի նահանջի ճնշումներից: Նախօրեին Իրանի սահմանադրության պահապանների խորհուրդը պաշտոնապես հայտարարեց, որ քվեարկության արդյունքները ուժի մեջ կմնան, քանի որ «ընտրությունների ընթացքում էական խախտումներ չեն եղել»: Սակայն ավելի ուշ այաթոլլա Համենեին համաձայնվել է երկարացնել խախտումների բողոքարկման ժամկետը եւս հինգ օրով:
Ընդդիմադիր առաջնորդ ու նախկին վարչապետ Միր Հոսեյն Մուսավին վերջին օրերին չի հայտնվել հասարակության մեջ: Միեւնույն ժամանակ Մուսավիի կայքում հայտնվել է նրա կնոջ` Զահրա Ռահնավարդի հայտարարությունը, որն ակտիվորեն մասնակցել է նախընտրական արշավին:
Հաղորդագրության մեջ ասվում է,որ նա նվիրում է իրեն ընտրությունները չեղյալ հայտարարելու համար պայքարին. «Դա իմ պարտքն է, պաշտպանել իրանցիների իրավունքները»:
Բացի այդ, կայքում ասվում է, որ Ռահնավարդը պահանջում է ազատ արձակել բոլոր նրանց, ում ձերբակալել են ընտրություններից հետո, ներառյալ Մուսավիի թերթի աշխատակիցներին:
Իրանում ընդդիմության կողմնակիցները կոչ են արել հինգշաբթի օրը սգո օր հայտարարել` ի հիշատակ զոհված առնվազն 17 ցուցարարների:
Եռօրյա ազգային սուգ հայտարարելու կոչ է արել այաթոլլա Հոսեյն Ալի Մոնթարեզին, հաղորդում է BBC-ին:
