«Ռուսաստանի, մասնավորապես Կրասնոդարի մարզի հայերը որոշակի անվստահություն ունեն Հայաստանի քաղաքական եւ տնտեսական գործընթացների հանդեպ, եւ չնայած դրան, առանձին դեպքերում կա կայուն համագործակցություն, բայց ոչ այն մասշտաբներում, որոնք ցանկալի կլինեին: Մասնավորապես, մենք շատ հույսեր էին կապում Սփյուռքի նախարարության հետ, որոնք, ցավոք, ի կատար չածվեցին»,- այսօր Երեւանում կայացած մամլո ասուլիսին հայտնել է Ռուսաստանի հայերի թերթի` «Երկրամասի» գլխավոր խմբագիր Տիգրան Թավադյանը:
Ինչպես նշում է Թավադյանը, հայկական համայնքը զգալիորեն ցնցված էր ապրիլի 24-ի նախօրեին հայ-թուրքական «ճանապարհային քարտեզի» ստորագրումից: «Համայնքն իրեն որոշ չափով վիրավորված էր զգում հայ-թուրքական փաստաթղթի ստորագրումից հետո: Մենք գտնում ենք, որ Հայաստանի իշխանությունները Հայոց ցեղասպանության ճանաչման եւ Լեռնային Ղարաբաղի հակամարտության կարգավորման հարցերում պետք է հաշվի նստեն սփյուռքի կարծիքի հետ»,- ընդգծել է նա:
PanARMENIAN.Net-ի թղթակցի այն հարցին, թե արդյոք ռուսական սփյուռքի հայ ձեռներեցների կողմից որեւէ ներդրումներ են կատարվում Լեռնային Ղարաբաղի Հանրապետության զարգացման գործում, Թավադյանը պատասխանել է, որ, իհարկե, կատարվում են:
