Իրանի միջուկային ծրագրի վերաբերյալ ՄԱԳԱՏԷ-ի վերջին զեկույցը հաստատում է նրա խաղաղ բնույթը: Ըստ Ատոմային էներգիայի միջազգային գործակալությունում Իրանի ներկայացուցիչ Ալի Սոլթանիի, փաստաթուղթը ցույց է տալիս, որ Իրանը համագործակցում է ՄԱԳԱՏԷ-ի հետ, հաղորդում է «Ռոյթերս» գործակալությունը:
ԱՄՆ-ն այդ համագործակցությունը թերի է համարում եւ ընդգծել է, որ Իրանում հակառակ ՄԱԿ-ի պահանջներին շարունակվում է ուրանի հարստացման ծրագիրը:
Ինչպես ասվում է զեկույցում, Իրանը դանդաղեցրել է ուրանի հումքի վերամշակման տեմպերը, սակայն շարունակում է ուրանի հարստացման համար անհրաժեշտ ցենտրիֆուգներ տեղադրել: ՄԱԳԱՏԷ-ն նշում է, որ մնում են Իրանի միջուկային ծրագրի հնարավոր ռազմական նշանակության հետ կապված հարցերը:
