Ինչպես հայտնի է, հանրաքվեից շատ առաջ Ռեջեբ Էրդոգանը հասկացնել տվեց, որ եթե կղզու միավորման հանրաքվեին թուրքերը կողմ արտահայտվեն, իսկ հույները` դեմ, ապա լավագույն դեպքում Անկարան կպնդի ՀԿԹՀ-ի միջազգային ճանաչումը, իսկ վատագույն դեպքում հարց կդնի չճանաչված պետությունը Թուրքիայի կազմում ներառելու մասին: Այդպես էլ եղավ: Եւ այժմ Անկարան իսկապես հիշեցնում է իր խոստման մասին: «Հանրաքվեի արդյունքները ցույց են տալիս, որ եղբայրական երկրները կարող են սկսել ՀԿԹՀ-ի ճանաչման գործընթացը»,- հայտարարել է Ռեջեբ Էրդագոնը: «ՀԿԹՀ-ն փաստացի պետություն է: Այժմ արդեն գոյություն չունի Կիպրոսի միացյալ հանրապետությունը»,- շեշտել է նա:
Անկարայում կարծում են, որ Կիպրոսի թուրքական մասի վարկանիշի դրական վերափոխում է տեղի ունեցել, որը եւ թույլ կտա ոչ միայն պատժամիջոցների վերացման հարցը դնել, այլեւ` ճանաչել դրա ինքնավարությունը: Լիովին բնական է, որ թուրքերն առաջին հերթին իրենց հայացքն ուղղում են դեպի Բաքու, քանի որ Իլհամ Ալիեւը միակ նախագահն էր, որ արտահայտվել էր ինքնակոչ պետության ճանաչման հնարավորության վերաբերյալ: Հիշեցնենք, որ ապրիլի սկզբին պաշտոնական այցով գտնվելով Անկարայում` նա ասել էր, որ Ադրբեջանն այն առաջին պետություններից կլինի, որոնք կճանաչեն Հյուսիսային Կիպրոսը, եթե կղզու հունական համայնքը մերժի միավորման պլանը: Այժմ արդեն ժամանակն է, որ Ալիեւը պատասխան տա իր խոսքերի համար: Թուրքիայում սպասում են, որ խոսքերը գործի վերածվեն: «Ոչ մի խոչընդոտ չկա ՀԿԹՀ-ի ճանաչման համար: Ադրբեջանը կարող է նման որոշում կայացնել: Դա իր խորհրդարանի բնական իրավունքն է: Եվ երբ նման որոշումը կայացվի, ոչ ոք չի հարցնի` ինչու այն ընդունվեց»,- հայտարարել է Թուրքիայի վարչապետը «Անադոլու» գործակալությանը տրված հարցազրույցում: Այդպիսով, Ռեջեբ Էրդագոնն ակնարկել է, որ Անկարան Բաքվից կոնկրետ քայլեր է սպասում:
Չնայած Բաքվի թերթերն արդեն քննարկում են ՀԿԹՀ-ի ճանաչման հարցի վերանայումը մեջլիսում, Ադրբեջանի իշխանությունները շարունակում են լռել: Կարծես թե, Իլհամ Ալիեւն ինքն էլ ուրախ չէ, որ շտապել է նման պատասխանատու հայտարարություն անել: Ադրբեջանի համար երկու վտանգ կա: Առաջին հերթին Ղարաբաղը: Եթե Ադրբեջանն ընդունի ՀԿԹՀ-ը որպես երկու պետություն, ապա ԵՄ-ի անդամ-պետություններն անմիջապես կճանաչեն Լեռնային Ղարաբաղի անկախությունը: Մեկ այլ խնդիր էլ կա` կապված եվրոպական կառույցներին ինտեգրվելու` պաշտոնական Բաքվի վարած քաղաքկանության հետ: Եվրամիությունն իր կազմի մեջ է ընդունել Կիպրոսը, որը ՄԱԿ-ի կողմից ճանաչվել է մինչ թուրքական ներխուժումներն ունեցած սահմաններով: Սա նշանակում է, որ ԵՄ-ի անդամ ոչ մի առանձին պետություն չի կարող բարձրացնել թուրք անջատողականների խամաճիկային վարչակարգի ճանաչման հարցը: Ավելին, նման զառանցանքային մտքերը չեն կարող հավանության արժանացնել նաեւ ԵՄ-ին անդամակցելու հավակնություններ ունեցող պետությունները: Այսպիսով, ՀԿԹՀ ճանաչելով` Ադրբեջանը ոչ միայն կկորցնի ԵՄ-ին անդամակցելու իր շանսերը, այլ նաեւ չի ներգրավվի «Նոր հարեւաններ» ծրագրում:
Օրերս Բաքվի «Թուրան» լրատվական գործակալությունը Հյուսիսային Կիպրոսի ճանաչման մասին Իլհամ Ալիեւի խոստումի վերաբերյալ հարցում է կատարել տեղի քաղաքական գործիչների շրջանակում: Հարցվողների բացարձակ մեծամասնությունը այն կարծիքն են հայտնել, որ նախագահը դժվար թե իվիճակի լինի իր խոստումը կատարել:
