Ապրիլի 22-ին ԵԱՀԿ Մինսկի խմբի համանախագահներն ամբողջական կազմով Մոսկվայում քննարկելու են Լեռնային Ղարաբաղի հակամարտության հանգուցալուծման հարցը: Այդ մասին լրագրողներին Բաքվում հայտարարել է ռուսասռանցի նոր համանախագահ Իգոր Պոպովը:
Նրա խոսքերով, դրանից հետո կարելի կլինի խոսել կողմերի միջև վերջին բանակցությունների արդյունքների մասին:
ԵԱՀԿ ՄԽ ռուս և ամերիկացի համանախագահներ Իգոր Պոպովը և Ռոբերտ Բրադկեն չորեքշաբթի օրը Բաքվում հանդիպում են անցկացրել Ադրբեջանի նախագահ Իլհամ Ալիևի և ԱԳՆ ղեկավար Էլմար Մամեդյարովի հետ: Հանդիպմանը նախկին համանախագահ Յուրի Մերզլյակովն ադրբեջանական կողմին ներկայացրել է Իգոր Պոպովին: Սպասվում է, որ հինգշաբթի օրը Մոսկվայում իր գործընկերներին միանալու է նաև ֆրանսիացի համանախագահ Բերնար Ֆասյեն:
Ինչպես նշել են համանախագահները, Բաքվում բանակցություններն ընթացել են դրական և կառուցողական մթնոլորտում: “Ես ինչպես միշտ տեսա նախագահ Իլհամ Ալիևի` հակամարտության խաղաղ հանգուցալուծման ձգտումը”,- ասել է Բրադկեն:
