Թուրքական Taraf թերթի հոդվածագիր Ռասիմ Օզան Քյութաղյալուն կդատվի Թուրքիայի ՔՕ 301-րդ հոդվածով, որը քրեական պատիժ է նախատեսում թուրքական ազգի, Թուրքիայի Հանրապետության, կառավարության, խորհրդարանի և երկրի դատական համակարգի վարկաբեկման համար:
Ինչպես գրում է թուրքական Hurriyet Daily News թերթը, լրագրողին մեղադրանք է ներկայացվել այն բանի համար, որ 2009 թվականին նա քննադատել է Թուրքիայի Գլխավոր շտաբի նախկին պետ Իլքեր Բաշբուգին և իր հրապարակման մեջ գրել հետևյալը. «Դու պետական գործիչ չես, Իլքեր Բաշբուգ, դու բյուրոկրատ ես»:
Այս արտահայտության համար Թուրքիայի Գլխավոր շտաբը դատի տվեց լրագրողին` Անկարայի Գլխավոր դատախազությունից պահանջելով հրապարակման հեղինակին դատել ՔՕ 301-րդ հոդվածով:
Նույն այդ հոդվածով դատվել էր նաև հայ-թուրքական «Ակոս» թերթի գլխավոր խմբագիր Հրանտ Դինքը, որը 2007 թվականի հունվարի 19-ին Ստամբուլում «Ակոս» թերթի խմբագրության դիմաց սպանվեց թուրք ազգայնականի կողմից:
