Ադրբեջանի նախագահի օգնական Հիքմեթ Հաջիևը Թուրքիայում հայտարարել է, որ Բաքուն ակնկալում է, որ ՀՀ Սահմանադրությունից կհանվեն այն դրույթները, որոնք «տարածքային նկրտումներ են պարունակում Ադրբեջանի և Թուրքիայի հանդեպ»: Այդ մասին նա ասել է թուրքական Haber Global հեռուստաալիքին տված հարցազրույցում, գրում է APA-ն:
«ՀՀ-ում շուտով կսկսվի նոր Սահմանադրության ընդունման գործընթացը՝ նման ազդակներ ենք ստանում: Հնարավոր է, հանրաքվե անցկացվի: Այն բանից հետո, երբ տարածքային պահանջները կհանվեն ՀՀ Սահմանադրության նախաբանից, Ադրբեջանը խնդիր չի տեսնի վերջնական խաղաղության պայմանագիր ստորագրելու հարցում»,- ասել է Հաջիևը։
Նա հավելել է, որ տարածաշրջանում արդեն իսկ փաստացի խաղաղություն է հաստատվել:
Ադրբեջանը մշտապես նախապայմաններ է առաջ քաշում ՀՀ հետ խաղաղության պայմանագրի ստորագրման համար, որոնցից է ՀՀ Սահմանադրությունից Լեռնային Ղարաբաղի հիշատակման հեռացումը:
