Ադրբեջանի նախագահի օգնական Հիքմեթ Հաջիևը հայտարարել է, թե Ադրբեջանը չի սահմանափակվում միայն հայտարարություններով, և Բաքուն, նրա խոսքով, գործնական քայլերով ցույց է տվել խաղաղության նկատմամբ իր հանձնառությունը։ Այդ մասին նա ասել է թուրքական Milliyet պարբերականին տված հարցազրույցում, գրում է Factor.am-ը:
Նշվում է, որ Հաջիևը դրական է գնահատել Հայաստանի գործող իշխանությունների կողմից «Իրական Հայաստան» հայեցակարգի ընդունումը՝ որպես հիմնական մոտեցում։
«Մենք գիտակցում ենք, որ հայկական կողմը ևս ընդունել է նոր աշխարհաքաղաքական իրականությունը և համապատասխանաբար ձևավորում է իր քաղաքականությունը։ Հայաստանն այժմ գիտակցում է Ադրբեջանի և Թուրքիայի հետ հարաբերությունների կարևորությունն իր սեփական զարգացման համար»,- նշել է Հաջիևը։
Նա նաև հայտարարել է, որ, այսպես կոչված, «Զանգեզուրի միջանցքի» բացումը նոր աշխարհաքաղաքական իրականության բաղադրիչ է և, նրա գնահատմամբ, համապատասխանում է ինչպես Ադրբեջանի, այնպես էլ Հայաստանի շահերին։
«Որովհետև Հայաստանը նույնպես հասկանում է, որ տարածաշրջանում տարանցիկ հնարավորությունների առկայությունը կարևոր է իր սեփական զարգացման համար։ Մենք ցանկանում ենք, որ Ադրբեջան-Հայաստան և Թուրքիա-Հայաստան խաղաղության գործընթացները զուգահեռ ընթանան և արդյունքների հասնեն», – ընդգծել է Հաջիևը։
Բացի այդ, նա կրկնել է Ադրբեջանի դիրքորոշումը, ըստ որի՝ վերջնական խաղաղության համաձայնագրի ստորագրման համար Հայաստանը պետք է Սահմանադրությունից հանի այն դրույթները, որոնք Բաքուն դիտարկում է որպես տարածքային պահանջներ։
