ՀՀ երկրորդ նախագահ Ռոբերտ Քոչարյանի կալանքի ժամկետը երկարացվել է ևս 2 ամսով։ Այդ մասին հայտնել է նախկին նախագահի փաստաբան Արամ Օրբելյանը, տեղեկացնում է Sputnik Արմենիան:
ՀՀ հակակոռուպցիոն դատարանի դատավոր Վարդգես Ստեփանյանը որոշում է կայացրել բավարարել դատախազ Ծովակ Մնացականյանի ներկայացրած միջնորդությունը։ Մեղադրող կողմը հիմնավորել է իր պահանջն այն հանգամանքով, որ ազատության մեջ գտնվելու դեպքում Ռոբերտ Քոչարյանը կարող է խոչընդոտներ ստեղծել նախաքննության ընթացքի համար։
«Դեռևս չենք ծանոթացել դատավճռի բովանդակությանը, սակայն պատրաստվում ենք բողոքարկել այն, քանի որ մեղադրանքի մեջ արդեն իսկ գտել ենք խնդրահարույց կետեր»,–ասել է նա։
Պաշտպանական թիմն ավելի վաղ հայտարարել էր` սա արվում է այն դեպքում, երբ ՀՀ երկրորդ նախագահը, որպես պետական պահպանության ենթակա անձ, 24/7 ռեժիմով ՊՊԾ աշխատակիցների հսկողության ներքո է։
Օգոստոսի 25-ին, իրավապահները մուտք են գործել Ռոբերտ Քոչարյանի, ինչպես նաև նրա որդու՝ Ազգային ժողովի «Հայաստան» խմբակցության պատգամավոր Լևոն Քոչարյանի բնակարաններ և խուզարկություններ են սկսել։ Դրանից հետո տեղեկություններ են հրապարակվել, որ ձերբակալվել են Ռոբերտ Քոչարյանը և նրա ավագ որդին՝ Սեդրակ Քոչարյանը։ Ավելի ուշ Սեդրակ Քոչարյանի նկատմամբ դատարանը երկամսյա կալանք է կիրառել։ Օգոստոսի 27-ին նույնպիսի որոշում է կայացվել նաև Ռոբերտ Քոչարյանի վերաբերյալ՝ նրան երկու ամսով կալանավորելու մասին։
Ռոբերտ Քոչարյանի նկատմամբ մեղադրանքներ են առաջադրվել պաշտոնեական լիազորությունները չարաշահելու, առանձնապես խոշոր չափերով փողերի լվացում իրականացնելու, ինչպես նաև առանձնապես խոշոր չափերով կաշառք ստանալու համար։
